نفى أحمد صبور، مهندس صوت مسلسل "لام شمسية" وجود جملة "هي نسيت وانتي منسيتيش"، في أحداث الحلقة الأولى للمسلسل، وذلك بعد أن انتشرت على وسائل التواصل الإجتماعي كدليل على أن وسام تحرش بزينة.
وكتب أحمد صبور على صفحته على أحد مواقع التواصل الإجتماعي:"أكتر حاجة لفتت نظري في الدوشة والإشاعات اللي حصلت على نهاية لام شمسية هي إشاعة إن في الحلقة الأولى وسام قال لرباب وهو بيغسل شعره "هي نسيت وانتي منسيتيش" والناس بتستخدم ده على إنه دليل قاطع إن كان في تمهيد لأن وسام اتحرش بزينة.اتفاجأت بقد أيه الناس كلها بتقول أن الجملة دي اتقالت وأنا مش فاكر خالص اني سمعتها، مع العلم إني بسمع كل مشهد بدل المرة ألف بحكم إني كنت مصمم شريط الصوت للمسلسل، فارجعت للحلقة وملقيتش أي جملة تشبه أصلا الجملة دي، وشكيت في نفسي لدرجة اني رجعت سمعت صوت كل الtakes اللي اتسجلت للمشهد ده والجملة دي متقالتش في ولا مرة منهم، بل ورجعت للنص الأصلي للمسلسل كمان والجملة دي ملهاش أي وجود في أي حته، الموضوع كله أن في حد بدأ الإشاعة دي وبدأت تنتشر وبعدها تحولت لMandela Effect أو تأثير مانديلا وهو عبارة عن ظاهرة نفسية حيث يتشارك عدد من الأشخاص في تذكر حدث أو معلومة بطريقة غير دقيقة أو مغايرة للواقع الفعلي، وتقدروا تبحثوا في جوجل وتقروا أكتر عن الظاهرة دي".
