ردت الإعلامية المصرية ريهام سعيد على الذين يتهمونها بالمتاجرة بمرضها.
وقالت سعيد: "أنا شيفاها سفالة وقلة ذوق وقلة رحمة، هل أنا هقعد حابسة نفسي في البيت شهر علشان أمثل إني تعبانه؟، هل أنا لميت تبرعات على مرضي؟ هل لما تعاطفت معايا مرتبي زاد ؟ أنا ست كويسة غصب عنك، ربنا بيبتليني علشان بيحبني، انا مطلعتش أعيط للناس وأعمل فيديوهات وأقول الحقوني، على فكرة أنا بقالي 3 شهور عيانة ومقولتش لحد، دايما قوية وعمري ما تاجرت بحاجة".
وأضافت: "أنا مبحبش أصعب على حد ومبحبش حد يتعاطف معايا، وانا ست قوية جدا بايماني بالناس اللي هتقف معايا، انا عملت خير كتير جدا في حياتي وواثقة ان ربنا هيطلعني من اي حاجة وحشة، هو انا اصلا كنت محتاجة تجميل في مناخيري؟ ولا محتاجة تجميل في اي حاجة؟ وحتى لو عملت عملية تجميل انت مالك، دي حرية شخصية، انت مالك، انا تعبت وكنت بموت زي اي واحد، للناس المريضة دي، على فكرة مبيكذبش غير الكذاب ومبيخونش غير الخاينين، يعني شريف مدكور لما كان بيستقبل الناس في بيته يبقى كدا هو مكنش عنده كانسر؟ كان بيمثل؟ هل هو الواحد لازم يموت علشان ميكنش بيمثل، هل لازم يكون خبر وفاتي انهاردة علشان تقول انها مش بتكذب".
وختمت: "انا كنت عيانة وخفيت وراجعة احسن واقوى من الاول وراجعة برنامجي وهيبقي احسن من الاول، باذن الله باذن الله، يوم الحد هتبقوا مكسوفين اوي علشان كنت مصورة كل الي حصل، اد ايه هي حاجة قذرة انك تثبت للناس انك كنت بتموت، انا قلت لما اموت ادعولي مش اتعاطفوا معايا، انا مش عايزة اصعب على حد انا طلبت الدعاء بس، الدكتور لما تشوفوه هيقولك اللي حصل دا معجزة، كان علطول يقولي انتي محتاجة معجزة، لو مستكتر عليا ان انا اخف دي مشكلتك، لو مستكتر عليا ان انا ارجع شغلي واعيش حياتي، وكنت عاوز خبر وفاتي للاسف دا مش وقتي".
