نشر الفنان ربيع الجميل، مساء أمس الخميس، بيانًا عبر أحد حساباته الخاصّة على مواقع التواصل الإجتماعي، ليُوضّح لجمهوره عن آخر المُستجدّات التي حصلت في الدعوى القضائيّة، التي تقدّمت بها شركة الإنتاج التي تعامل معها "اكس راي برودكشن" بحقّه.
وأرفق الجميل، البيان بصور رفض الدعوى بخطّ يدّ القاضي رالف كركبي.
وهذا ما جاء في بيان الجميل:"بدي خبركن خبرية بكل صراحة، أنا ربيع جميل الجميّل أضعف إنسان بهالدني كلا وما بملك بحياتي شي دافع فيه عن حالي إلا رضا ربنا دخيل إسمو وإيماني الصلب فيه ورضا أهلي عليي ومحبة الناس الصادقة يللي ما فيها أيا غاية أو مصلحة ، بهودي الإشيا وبس أنا صرت بحس إني أقوى إنسان بالعالم وبعرف إني قادر إعمل المستحيل وقوم من تحت الموت وبقدرة ألله سَبق وعملتا وكلكن بتعرفو … بلا طول سيرة أنا بعمري ما ظلمت حدا ولا تعديت على نملة والناس كلا بتعرف هالشي وبالوقت ذاتو ما حدا ظلمني أو أذاني نهار إلا وربنا كان كفيل ياخدلي حقي ومستحقي منو."
وتابع الجميل:"أنا سكتت كتير وتحملت أكتر بس لما حسيت بظلم ما بينحمل ومحاولة تدمير لمستقبلي، انا اللي بادرت برفع دعوى قضائية على شركة إكس راي برودكشن مش العكس والدعوى مسجلة عند القضاء المختص بتاريخ بتاريخ 17/2/2017 ، واليوم بدي بشّركم جميعاً إنو القضاء اللبناني النزيه أنصف ربيع الجميّل وردّ الدعوى الظالمة والمتعسفة ردّ صريح وواضح وصورة الرفض قدامكن بخط يد حضرة القاضي النزيه رالف كركبي ، هالدعوى اللي كانت اتقدمت فيها الشركة المذكورة بعد دعوتي الأساسية ضدهم بفترة طويلة بهدف تحجيمي وتجميد نشاطاتي الفنية وإلغاء انتشار أعمالي وحفلاتي وبعد الكتاب الوهمي اللي بعِتته هالشركة لكل وسائل الإعلام بهدف إيقاف أغنياتي عن الهوا وبالتالي عن سَمعكم الغالي ، الحمدلله ثقتي بعدل السما وعدل القضاء اللبناني طلعِت بمحلها ، ومتل ما سبق وقلتلكن يللي بتحبوني بصدق ، هالحنجرة وهالموهبة اللي عندي ، ألله دخيل إسمو هوي اللي وهبني ياهن وهوي وحدو بيقدر يسكّتهن او ياخدهن مني ... وأنا أصلاً صوتي وفني ونجاحي وكل شي فيي نادرهن للعدرا دخيل إسما ، فا اللي بدو يحاربني بيكون عم يحاربها إلا ...".
