ردّ الشاعر المصري بهاء الدين محمد على ما قاله الملحن عمرو مصطفى بشأن الفنانة المصرية شيرين عبد الوهاب، مؤكداً أن ذكر اسمه في هذه الأخبار واعتباره شاهداً على وقائع لم تحصل أمر دفعه إلى الرد ونفي كل هذه الأخبار.
وقال الشاعر المصري:" هام جدا : إلى الملحن عمرو مصطفى :
أولا : فوجئت على أكثر من موقع إعلامي وصحفي إنك ذكرت إسمي وإسم الأستاذ المنتج نصر محروس كشهود على وقائع لم تحدث وإدعاءات غير صادقة تمس شخص الفنانة المطربة شيرين عبد الوهاب بصورة غير حضارية ولا فنية .
ثانيا : على ما اتذكر انك ماكنتش لسه موجود كملحن ف الفترة اللي بدأت شيرين فيها وجودها الفني ولو كنت موجود كملحن ف بدايتك أظن من الصعب على شخصي وشخص نصر محروس إننا نتحايل عليك تسمع صوتها وهذا كلام غير صحيح.
ومش ح اتكلم عن الكلام التاني اللي انت كتبته عن شيرين وتناولته المواقع والصحف اللي مايصحش أكرره تاني لعدم صحته ولبواخته وتهوره.
ثالثا : شيرين عبد الوهاب .. مطربة لها مكانتها ووجودها اللي أظن هجومك عليها بالاسلوب والمستوى ده كان تهور غير محسوب !!!
رابعا : نصيحة من أخ أكبر ليك : ماتخسرش المحترمين بتهور لأن الدنيا مابقاش فيها ناس كتير يستاهلوا نحافظ عليهم .
وماعندناش نجوم كتير ف نفس المكانة .. والمفروض فنان بإسمك وحجمك لازم يحاسب ويحافظ على صورتنا وصور نجومنا قدام الناس والوطن العربي وأخيرا منتظر منك الإعتذار للجميع لأني أثق إنك بتحترم الكبار .
خامسا : اخترت ردي يكون بنفس الاسلوب اللي اتبعته ف هجومك على شيرين وذكر اسمنا كشهود على وقائع لم تحدث .
وف انتظار اعتذار الفنان اللي جواك ".