شاركت الفنانة اللبنانية مي حريري الجمهور صورتين تجمعها بالفنان اللبناني الراحل زياد الرحباني، معبرة عن حزنها الكبير برحيله.
وكتبت مي حريري معلّقة: "يا روحي يا صديقي يا أستاذي…
برحيلك خسرنا مش بس فنان عظيم، خسرنا الإنسان اللي “حكيه ما عاد ينقال، كلشي عم يبكينا.”
كنت الحنون، الراقي، الصادق، والسند بكل لحظة.
صح مش ضروري النهايات تكون سعيدة على طول ..
بس إنت حتضل روحك إنسانيتك عايشة معنا !"
"فضي لبنان…
آخر العنقود راح.
زياد مش بس فنان،
كان حالة، كان نبض، كان جرح ما بيندمل…
وكان إلي، شي أكبر من حب.
كنت تقلّي:
“إنتِ حبي الأفلاطوني”،
وأنا كنت صدقك،
لأنك ما كنت بتكذب…
كنت بتحكي الحقيقة متل ما هي، حتى لو وجعت.
اليوم قلبي موجوع…
موجوع على الوطن اللي ما عرف قدّك،
وعلى الناس اللي ما فهمتك إلا متأخّر،
وعلى حالنا… لأنو ما بقا في متلك.
الله يصبّر الست فيروز،
ويقوّي قلب ريما،
ويعطينا شويّة عزاء بهالعتمة اللي تركتنا فيها.
كنت غير كلّ الناس،
كنت بتشبه الثورة قبل ما يعرفوا شو يعني ثورة،
كنت بتغني الوجع بصوت ضحكة،
وبتضحك متل حدا مخبي الدنيا بعيونو.
رحلت يا زياد،
بس بعدك بيناتنا…
بضحكتك، بكلمتك، بلحنك، بغيابك اللي بيحكي أكتر من حضور مية شخص.
يا حبّي الأفلاطوني…
يا صوت الضمير اللي ما سكت،
يا وطن لحالو…
نام منيح، نحنا كتير تعبانين".
