وجه المخرج المصري محمد سامي، رسالة إلى زميله الفنان المصري تامر حسني، الذي يجمعه به علاقة صداقة قوية.
ونشر محمد عبر حسابه الرسمي، صورة تجمعه بتامر، من كواليس تصوير مسلسل "آدم"، الذي لعب بطولته حسني، وقدم سامي موهبته الإخراجية من خلاله.
وكتب محمد في رسالته: "وَلَا تَنْسَوُا الْفَضْلَ بَيْنَكُمْ.."، وأضاف: "و أنا قاعد إمبارح في التصوير افتكرت الرحلة و الشقي و التعب من أول عمل لحد العمل اللي بصوره دلوقتي و افتكرت صعوبة الحصول علي فرصة عشان الواحد يثبت نفسة و يحقق أحلامه، فطبعا افتكرت أخويا و صاحبي الجدع الطيب الخلوق اللي دعمني من أول لحظة و كان سبب في اللي أنا فيه دلوقتي".
وتابع: "تامر قدملي كل الدعم و الحب و الامكانيات اللي خلتني اثبت نفسي وبالذات في وقت كان صعب الشباب ياخد في الدرامة فرصة بحجم مسلسل آدم، فاكر اني الكل كان رافض اني اخد الفرصة دي ومستكبرينها عليا الا هو وقف في ظهري كأنه بيحارب لأخوه و بصلي مرة والظروف كلها ضدي و كنت حاسس وانا بحضر انهم هيجيبو حد غيري و قاللي ده مسلسلك و هتعمله و هتنجح و هتنجحنا معاك".
وأضاف: "حتي طريقته المتواضعة و هو بيقوللي مسلسلك كأني عامل تسع مسلسلات قبله تحسس الواحد بنفسه و أهميته ، أشهد أمام الله إنك طول عمرك متواضع و مؤدب وتطلب الحاجة باحترام، ومع الكرو محترم وعشان كدة كلنا روحنا فيك".
وختم قائلا: "بحبك يا صاحبي و تستاهل كل حاجة حلوة يا أجمل قلب، ويا رب يرزق كل الناس باللي يساعدهم علي تحقيق أحلامهم زي ما رزقني بتامر حسني".
وبدوره، رد تامر حسني على رسالة سامي، وشكره على كلماته قائلاً "خلتني أدمع يا سمسم"، ولفت إلى أنه آمن بموهبة محمد سامي قبل كل شيء، "لأنه موهوب بشكل غير طبيعي"، وتابع أنه كان يقدم "مكسباً حقيقياً للصناعة"، كاشفاً عن كونه وقت تسجيل رقم محمد سامي على هاتفه سجله باسم "سامي ابني"، لأنه كان يتعامل معه بقلب الأب.
وختم حسني تعليقه بذكر الأعمال التي قدمها من إخراج محمد سامي، مشيراً إلى وجود أعمال مستقبلية ستجمعهما معاً، من أجل إعادة النجاح من جديد.
