شاركت الكاتبة السورية لوتس مسعود الجمهور مقطع فيديو لوالدها الممثل السوري غسان مسعود، كشفت من خلاله عن حبها الكبير له، وعن تعلقها به، على أنغام أغنية "على بابي واقف قمرين" للفنان اللبنان الراحل ملحم بركات.
ووصفت لوتس والدها قائلة: "الحب الأول لأي بنت و يلي بتتعرف من خلالو على معنى الحب و الرجولة من طفولتها هو أبوها ،، فكيف اذا كان أبوها رجال بتحلف براسو الناس يلي بتعرفو ويلي مابتعرفو ،، رجال لهلأ بحس اني اضعف من اني اتطلع بعيونو و قلو أديش بحبو ، لإنو كلمة بحبك ما بتعبر شو بحس حتى لما اسمع صوتو من بعيد او شوفو مارق من شي مكان ونحنا برا البيت وصير اصفن فيه كل مرة كإنو اول مرة بشوفو و فعلاً ما افهم ليش صافنة فيه هيك لحتى تخلص هالصفنة بابتسامة تاخدني غدر و تنرسم على وجي بدون ما حس ..
من لما كنت صغيرة كنت بشوف حالي انو هاد الرجال الحلو اللطيف القوي الحنون الكريم الرومانسي اللي بيعرف كل شي و عندو جواب لكل شي بيخطر عالبال هو بابا ،، و كبرت و صار بس حدا يسألني ليتأكد “ أبوكي؟؟!” برد بنفس هديك الابتسامة اللي بتغدرني بالمواقف اللي بتخصو “أي بابا “ ، و كل مرة بينقال اسمو قدامي بحس كإنو هالاسم صار وصف اكتر ماهو اسم لحالة بعمري ما قدرت شوف فيها الا الجمال و الأمان و الحب بأعلى درجاتو …
مو بقولوا كل فتاة بأبيها معجبة ؟! أنا هي الفتاة اللي معجبة و عاشقة و مسحورة بهاد الرجال يلي عطى و عم يعطي لكلمة أب معاني اكتر من ما أصلاً الكلمة بحد ذاتها بتحمل .. و بالنسبة إلي اذا في مرادف باللغة ممكن يكون لكلمة أب و بتخليها غنية أكتر ، فهو غسان مسعود".
