روى المؤلف المصري عمرو محمود ياسين، كواليس تصوير مشهد عزاء الممثلة ندى موسى في مسلسل "وتقابل حبيب" بطولة الممثلة المصرية ياسمين عبد العزيز.
وكتب عمرو على صفحته على أحد مواقع التواصل الإجتماعي:" وأنا بتفرج على مشهد العزاء في مسلسل وتقابل حبيب، رجعت بالذاكرة لورا، لليوم اللي صورنا فيه المشهد ده.. المشهد اللي كنا دايمًا أنا والمخرج محمد الخبيري بنتكلم عنه.كل مرة كنت بسأله: هنعمله إزاي؟ بتفكر في إيه؟ لأنه كان من أكتر المشاهد اللي شايلين همها، بسبب عدد الممثلين الكبير، وطوله، وتعقيده.لحد ما في يوم قال لي: أنا شايف إن المشهد ده لازم يبقى وان شوت.. بصراحة كانت فكرة جريئة جدًا، والمغامرة فيها عالية لان المشهد مليان تفاصيل وعلاقات، بس لما دخلنا نصوره، أدركت قد إيه هو عنده رؤية واضحة للمشهد.التنفيذ مكانش سهل خالص.. المشهد مدته 8 دقايق كاملة، أي غلطة، مهما كانت صغيرة، سواء من الكاست أو الكرو، كانت بتخلينا نعيد من الأول. وفعلا اضطرينا نصوره أكتر من مرة، وكل مرة كان في غلطة هنا أو هناك، لكن كنا عارفين إننا بنحاول نعمل مشهد حلو."
وتابع:"في النهاية، خبيري قدر ينفذ المشهد بشكل رائع، وخرج واحد من أقوى مشاهد الدراما.. ولما انتهينا من تصويره، احتفلنا ساعتها وكأننا صعدنا لكأس العالم.. الفرحة كانت حقيقية، لأن فعلًا تعبنا فيه وكل الكرو والممثلين بذلوا فيه مجهود.. بجد بقولها من قلبي برافو خبيري.. شغل عظيم، وإبداع يستحق كل التقدير، وإلى الأمام دائمًا".