علقت الفنانة المصرية شيرين عبد الوهاب على أزمة تسريب تسجيلات صوتية لطليقها الفنان حسام حبيب، والتي قال فيها إن عائلتها كانت السبب في تراجعها فنياً في فترة سابقة.
وصرحت شيرين مع الاعلامي عمرو أديب في برنامج "الحكاية" عن الموضوع، وقالت: "فوجئت باللي حصل على السوشيال ميديا بين محمد عبد الوهاب وحسام حبيب، وحبيت أكد أن كلام حسام مضبوط جدا، وأخويا فعلا باعني، والتصريح اللي نزل دا نزل من محامي محمد شاعر المستولي على السوشيال ميديا بتاعتي، وبالتوكيل أنا كنت عاملة له قديم، مضى له ورقة أو عقد تملكه من حساباتي، وموقعين بتاريخ قديم، كل كلام حسام حبيب مضبوط، وماتصدقوش أي حاجة من كلام محمد عبد الوهاب".
وتابعت: "أنا مابحبش اتكلم عن مشاكلي الشخصية دلوقتي، عشان ماشغلش حد، والناس ماتقعدش تقول احنا ماورناش غير شيرين ومشاكل شيرين، لكن لازم تفهموا أن في أغاني حلوة جدا جدا، توما عاملها وعزيز الشافعي ومدين، وفي حاجات بتخلص من التصريحات عشان المشاكل مع الشركة المنتجة، في حد بشخصه قاصد يقعدني في البيت، بنخلص الحاجات دي والأغاني هتنزل وهتعجبكوا جدا، وبإذن الله الأغاني هتعجبكم".
وعلقت على ما فعله حسام رغم خطوبتها: "مشكور أن هو بيرد بالنيابة عن أهلي، وهو اللي بيقول الحقيقة مش أهلي، وبرغم أن القضاء المصري حكم بانتهاء عقدي مع روتانا، هم لسه رافعين قضايا علي، وموقفين الدنيا كلها، لكني واثقة في نزاهة وقضاء بلدي".
وختمت: "أنا اسفة اني بشيلكم أخباري، بس أنا اضطريت، صحيت لقيت مواقع التواصل الاجتماعي مقلوبة، وماليش دخل في اللي بيحصل دا، صدقوني أنا مش عايزة اضايقكم بأي أخبار عني حلوة أو وحشة، أكيد كل واحد عنده هموم ومشاكل، ودا اللي بيتقال معندناش غير شيرين، صدقوني مش قصدي، بدليل إني مكنتش بتكلم الفترة اللي فاتت، أنتم أهلي وسندي وأثبتوا لي كدة وبتردوا غيبتي، وأي بيان لي هيصدر من مكتب المحامي ياسر قنطوش، وانتم عارفين مين اللي بيقولوا الحقيقة، هو مش أهلي".
