كشفت الفنانة المصرية المعتزلة جيني كامل عن رأيها بعد إنتشار تسجيلات صوتية لـ الفنان المصري حسام حبيب، وهو يتحدث عن زوجته السابقة الفنانة شيرين عبد الوهاب وعن عائلتها.
ونشرت جيني عبر حسابها الرسمي منشور، كتبت فيه: "كلمتين حق لوجه الله، شيرين عبدالوهاب من أكثر الشخصيات اللي شوفتها في الوسط الفني طيبة وجدعة وبسيطة، شقيت كتير من طفولتها ومحدش له فضل عليها غير موهبتها ونفسها بل، بالعكس لها أفضال على ناس كتير، وبدون مقابل، تقريبا أنا الوحيدة اللي هاجمت حسام في أزمتها أمام كل الناس في وقت كل الناس كانت بتقول هيتصالحوا وفعلا أتصالحوا بعدها، قابلتها السنة اللي فاتت في الرياض في حفلة الموجي، في فواصل المطربين حسام شافني خرج قلت له بقولك ايه بتحبني وبتدافع عني إلا چيني".
وأضافت: "فعلا قلت لها لو موتوا بعض أنا مش هتدخل، في أزمتي الأخيرة شيرين من القلائل اللي طلبتني وألحت وقالتلي كلام قمر يضحك موت ويبكي في نفس الوقت صحيح ممكن ما نتقابلش كتير بس ممكن نرغي بالساعات في مكالمة كانت بتهزر على نفسها لأنها كانت أطلقت بالفعل من حسام وسألتها أنتي قاعدة مع مين قالت خلاتي ما تيجي تتعشي معانا، كل ده لازم يتقال في حق واحدة عمري ولا عمرها ما كان لنا مصالح مع بعض بتحبني وبحبها من غير شروط".
وتابعت جيني: "هي فعلًا في أزمة وأنا مش عايزة أعرف مين سبب ولا وقت لوم للبنت، بس وبكل أمانة أنا قعدت مع أمها وأختها وأخوها وما شوفتش منهم غير أنهم ناس طيبين وعايزينها مبسوطة وعند نفس رأيي اللي يشوف مراته حالتها الصحية والفنية بتدهور كده يبقى سبب لأنه كان لازم يكون له دور لأنه ولي أمرها، حتى بالعافية، وخصوصا إنها بتحبه وأكيد كانت هتسمع كلامه".
وأوضحت: "أنا شايفة ناس نطت من المركب والبنت بتغرق بدل ما نشد أيد بعض أحنا مصممين نغرق بعض، في المواقف دي أنا ما بستأذنش حد أساعده أنا بروح على طول لكن للأسف أنا لا عارفة هي فين ومع مين".
وأكملت: "في الأخر البنت دي موهبة كبيرة وقبل الموهبة هي إنسانة، أقفوا جنبها ولو في حد منقذ يتدخل بإيده بقى بعقل بفلوس بنفوذ بسلطة يخش يخلص، ده اللي أنا بفهمه، حد يخش يخلص أو هنصحي في يوم نعيط بس كلنا".