عبّر الشاعر والملحن اللبناني فارس اسكندر عن سخطه من المنصة التي تم استحداثها في ظل الإغلاق العام في لبنان، والتي يلجأ إليها اللبنانيون لطلب إذن خروج، خصوصاً أن التجول ممنوع 24 ساعة إلا في الحالات المسموح بها.
ونظم اسكندر قصيدة ساخرة شاركها مع متابعيه في صفحته الرسمية على أحد مواقع التواصل الاجتماعي بعنوان "إذن خروج" وتقول :"
لما الحمار تفلسَـف بتفكير
سَـمَّع العالم صوت شَنهقتو
بس الحمير قلوب طيبة كتير
ما حدا بيئذي إبن منطقتو
عملتو منصة ذل بالتطوير
أرزاقنا بتشغيلها حرقتو
أذونات تتحكّم بالمشاوير
وفاسد يمشي الناس عاوقتو
جوّا الدكانة ما فيك تصير
إلا اذا الإذن الغبي برَزتو
والبنك لاقاها شحم عافطير
فرجيتو إذن خروج تا شحَـدتو
وحتى عامستشفى ما فيك تطير
إذن الغبا ان ما كنت حضّرتو
سؤالات هبلة وكود مع تأخير
بيكون مريضَك مات وخسرتو
بدنا منصة بإسم أيا فقير
بإسم الشعب اللي بدَيكن خنقتو
طلبتو إذن منا على التعتير
لما أموال العالم سرقتو ؟!
طلبتو إذن منا على التفجير
لما بأمونيوم شعبنا قتلتو ؟؟
طلبتو إذن عالنهب والتزوير
لما تاريخ البلد زوّرتو !!!
طلبتو إذونات الشعب يا خنازير
لما الشباب عالغربة هجّرتو !!
جيتو علينا تعملو نواطير
بحجة كورونا ليش ما كورنتو !!
ما حدا كورَن غيرنا يا كبير
انتو اللقاح من شي سنة خدتو
أملي بعزرايل يشيل الزير
ويسلخ لَ كل فاسد شي مية كف
وما يتركو تا يجيب آخرتو ...".
