قدّمت الممثلة الكويتية شوق الهادي اعتذارا لطليقها الراحل بدر الماص الذي توفي اليوم في الولايات المتحدة الأميركية بعد تعرضه لحادث سير.
وكتبت شوق على صفحتها الخاصة :"اللهم لا اعتراض.. الله يرحمك يا بدر.. كلنا مسامحينك ومحللينك.. ياريت لو يرد فيني الزمن يوم، ياريت لو كان عندك وقت أطول".
وأضافت: "ياريت لو مات كبريائي قبل ما إنت تموت، كبريائتا قتلنا وانتصر.. هذا يومك اللهم لا اعتراض، بس شلون أسامح نفسي؟، شلون أنسى كل شعور خليتك تحس فيه؟ شلون أتعايش مع شعوري بالذنب بكل شي خليتك تمر فيه؟، أذينا وجرحنا بعض وايد لكن أنا مسامحتك من زمان، إنت مسامحني؟، ما اعتذرتلك وقلتلك إني أدري لو الله كاتب وشفنا بعض راح أنسى كل شي صار معانا، بس خدك مني الموت وما انكتبلنا نشوف بعض، رحت وما صارتلي فرصة أعتذرلك وأقولك إني مسامحتك وأبي أبدي بداية يديدة معاك، رحت بدون ما أودعك.. كنت أتمنى يكون لنا مستقبل وما حسيت نفسي أبي بكون حق أي أحد غيرك.. لكن الله ما كتب هالشي وخلصت قصتنا بسرعة.. شلون أتعايش وأنا راح اتم مشتاقتلك طول عمري بدون ما أشوفك وأودعك؟، أخ لو يرد فيني الزمن لي أمس راح أقولك إني محللتك ومسامحتك وإني مازلت أشعر بالحب تجاهك وما نسيتك ولا لحظة، وذبحني طلاقنا وانفصالنا بطريقة سيئة على الملأ، وكان عندي أمل إن نرجع حق بعض بيوم حتى لو كبريائنا ما سمحلنا نعترف بهالشي لكن أنا أعترف الحين بعد فوات الأوان إني ما زلت أحبك يا بدر، الله يرحمك يا حبيبي لو تشوف سكثر الله سخرلك آلاف يدعونلك.. ارتاح يا فقيدي فأنت في مكان أفضل الآن".
