بعد أن أعنلت مصممة الأزياء ريم العدل عن إصابتها بفيروس كورونا، عبرت في منشور جديد على صفحتها عن امتعاضها من الضجة التي حصلت حول الامر، فكتبت :" امبارح كتبت پوست بعلن فيه إصابتي بكورونا.
. واللي أنا مش شايفاها عيب ولا وصمة.. لا أنا أول واحدة ولا آخر واحدة يا جماعة.. احنا في وباء عالمي.. وكل واحد مصاب أو مخالط عليه مسؤولية أخلاقية يبلغ اللي حواليه على فكرة عشان ياخدوا احتياطاتهم.. المهم من أول ما كتبت الپوست وأنا عمال يجيلي مكالمات من صحفيين طالبين تصريحات ومداخلات في برامج مهمة لادانة مهرجان الجونة ومش فاهمة ليه بجد؟ وكأن فيه ترصد لمهرجان الجونة اللي الحقيقة وبشهادة وزارة الصحة نفسها كان واخد كل الإجراءات الوقائية.. أي فعاليات مش تحت إشراف المهرجان مباشرة لا تخضع لمسئوليته وإنما هي تحت مسئولية منظميها، زائد إن كلنا أفراد راشدين مسئولين عن قراراتنا وسلوكياتنا.. فنهدا شوية يا جماعة. وعلى فكرة أستاذة نشوى مصطفى ربنا يقومها بالسلامة يارب ما كانتش في الجونة أصلاً! و وجز ماكنش في مهرجان الجونة ده واحد كان مسافر الجونة مع اصحابه طيب بلاش.. تامر هاشم اعلن اصابته قبل الجونة اصلاً و اكيد تامر هاشم اشهر مني بس ما تعملش علي تصريحه الزيطة اللي حصلت امبارح عشان ماكنش في ساعتها جونة نلوم علي منظميها.!! كفايا يا جماعة ارحموا نفسكوا.!! . انا ما شوفتش ناس بتتلكك عشان توقف الحياة بالطريقة دي! ربنا يسلّم ويحفظ الكل".
وبدوره علق الممثل اللبناني نيقولا معوض على المنشور كاتباً:"للأسف أنا حصل معايا نفس الحوار..
علماً انّ كان عندي كورونا قبل المهرجان.. و بعد ما خفّيت من كورونا و قبل مهرجان الجونة، عملت ٦ تحاليل PCR (بحكم انّي سافرت لبنان مرّتين، و كل مرّة تحليل في مصر قبل ما اطلع الطيّارة، و تحليل في مطار لبنان، و تحليل في لبنان قبل ما ارجع مصر)، و كلهم نتايجهم سلبيّة،
و ساعة حد بيقولّي انت اتعديت في المهرجان، و ساعة بسمع كلام ان كان عندي كورونا و رحت المهرجان عادي.. ده غير اللي بيقولّي "ليه ما عملتش فيديو و انت عيّان؟" كإنّو واجِب قَومي يعني..
PS: أنا تمام ، و في استراليا، و بصوَّر..".
