بعد أن تفاجأت منذ يومين برجل الأعمال سالم هيكل، وهو يطلب يدها على السجادة الحمراء في حفل ختام الدورة الرابعة من مهرجان الجونة السينمائي، علقت الفنانة المصرية بشرى على الأمر، وقالت :"الله يسامح كل مهندسي المشهد ده، إن كان الأستاذ خالد الصاوي أو شريف رمزي عن بعد، ومجموعة من الفنانين، افتكرت حد جراله حاجة أو وقع".
وأضافت بشرى خلال مداخلة هاتفية لها في برنامج "التاسعة"، الذي يعرض على التلفزيون المصري، ويقدمه الإعلامي وائل الإبراشي، قائلة :"الخطوبة بالشكل ده مكانتش في بالي خالص، خاصة إن خطيبي صديق طفولة، وعيلتي تعرفه ومتربيين مع بعض، فبالنسبة لي دي حاجة غريبة".
وقالت بشرى :"كنت بهزر معاه وبغيظه وبقول لسا موافقتش، بس أعتقد صعب جدا بعد كل المجهود دة والتواطؤ الحميد بين كل زمايلي وأصدقائي أقول لأ، عمر عشرة 24 سنة، واللحظة دي مش قادرة استوعبها".
وأضافت :"الراجل مسالم وصبور ومستني بقاله سنين، خاصة إنه كان متجوز وخلف وأنا اتجوزت وخلفت، وإحنا الاتنين محصلش نصيب فرجعنا اتقابلنا تاني".
وأكدت بشرى أنّ عائلتها كانت موجودة خلال الخطوبة، وتآمرت مع خطيبها لإتمام الأمر.
