شن الملحن المصري مدين هجوما كبيرا على الموسيقار المصري حلمي بكر، بسبب تصريحات الاخير أن لحن أغنية "حاجة مستخبية" لمحمد حماقي لم يحقق النجاح، قائلا: "يا أستاذ حلمي اللى حضرتك ماتعرفوش إن الحمد لله لحن حاجة مستخبية كان مع مطرب كبير مش نكرة وهو الفنان الكبير محمد حماقي، وحقق نجاح كبير جدا في مصر والوطن العربي، لدرجة أن النجاح ده وصل لتركيا".
وقال :"فيه موضوع كل الناس بتتكلم عنه الا انا رغم ان انا صاحب الموضوع وهو لحن #حاجة_ستخبية واللحن التركي و الاسرائيلي كمان و مهرجان بنت الجيران بس انا ساكت عشان مابحبش اعمل شو عالفاضي، بس لما الاقي الاستاذ حلمي بكر طالع امبارح مع الاستاذ عمرو اديب في برنامج الحكاية و قناة مهمة زي mbc بيتكلم على لحن اغنية حاجة مستخبية ان ده لحن ماحققش نجاح مع المطرب اللي اخدها (يقصد حماقي ) و ان اللحن ده مسروق من لحن تركي !
عايز اقوله يا استاذ حلمي اللي حضرتك ماتعرفوش ان الحمد لله لحن حاجة مستخبية كان مع مطرب كبير مش نكرة و هو الفنان الكبير محمد حماقي و حقق نجاح كبير جدا في مصر و الوطن العربي لدرجة ان النجاح ده وصل لتركيا و اتواصلوا معايا بكل احترام و اخدوا مني اللحن بشكل رسمي واتترجم للتركي مع نجمة كبيرة بحجم ebru_yaşar
وحضرتك ممكن تتأكد بنفسك ان اسم الملحن (محمد احمد فؤاد ) زي اسمي في التنازل و بتواصل دلوقتي معاهم عشان اسم الشهرة
و عايز اقول لحضرتك حاجة قبل ما تطلع في برنامج كبير زي ده لازم تتاكد من معلوماتك كويس عشان انت كده مافرقتش عنهم حاجة هم سرقوا مجهودي و حضرتك بتضيعه و ده شيئ يؤسفني انه يخرج من استاذ كبير زي حضرتك
ومش بس كده للاسف في حد اتهمني كمان اني سارقه من اسرائيل دخلت لقيت انهم سارقين مني فعلا جزء من اللحن مش اللحن كله و التاريخ كان من بعد نجاح الاغنية بثلاث سنوات وده للتوضيح مش أكتر".
