لم تستطع الإعلامية المصرية رضوى الشربيني تمالك نفسها أثناء حديثها عن وفاة الممثل المصري هيثم أحمد زكي، إذ إنهارت بالبكاء متأثرة، مؤكدةً أن الحياة ليس لها أية قيمة، وأن الموت قريب جدا منّا لكننا في غفلة عنه، وهيثم عانى من الوحدة في حياته وعند مماته.
وقالت :"الحياة لهتنا عن إننا هنقابل ربنا وعن العبادة وإننا هنموت في أي وقت.. وأنا أولكم.. الحياة لهتنا عن أهالينا وإخواتنا وأحبابنا.. موت هيثم عمل صدمة في وشنا خلانا عندنا تأنيب ضمير وحاسين بالذنب تجاهه هو شخصيا".
وأضافت خلال حلقة برنامجها "هي وبس" الذي تقدمه على قناة cbc بالأمس:"كنا بنقول هو ممثل ليه هو ابن ابوه وقد يكون كان دي هي الوسيلة الوحيدة لكسب الرزق بعد أبوه وامه ما ماتوا، لكن إحنا مارحمنهوش اللي كنا منعرفوش.. والناس اللي تعرفه مكنتش بتوده ولا بتسأل عليه".
وتابعت: "محدش فينا مستعد إنه يقابل ربنا.. واحدة زيي المفروض إنها تكون محجبة مفروض نكون بنصلي ولا بنكذب ولا بنم ويكون في ود ومودة ورحمة.. بس مفيش.. أنا مش داعية إسلامية خالص على فكرة وهبدأ بنفسي، موت هيثم خلاني مش عارفه .. اللي يقدر يقرب من ربنا أكتر من كده يقرب، وأنا أولكم.. اللي يقدر يقرب يعمل ده لأن الموت قريب أوي".
وختمت بالقول :"الولد كان في مقابلة تليفزيونية بيقول أنا خايف أموت لوحدي ومات لوحده، رغم إنه كان عنده مساعد وخطيبته، هو تعب من الوحدة، متخلوش حد يموت لوحده متخلوش حد عايش يحس إنه وحيد، ودوا بعض واسألوا عن بعض".
