بعد الانتقادات الموجهة لها والتي تشير الى انها دخلت عالم التمثيل من خلال "الواسطة" ردت الممثلة المصرية إنجي وجدان على الموضوع بشكل واضح وصريح بالتالي:
"أرجع تاني أقول والله ما ليا واسطة مدخلاني الوسط الفني، أبويا وأمي دكاترة، وأصلا كانوا ضد الفكرة تماما، قرايبي كلهم بعيد عن الوسط، دخلت والحمد لله عملت شغل حلو، وجت فترة مش أحسن فترة واتبهدلت واتحاربت من كذا اتجاه، وكنت كل مرة أقول خلاص كفاية ربنا يبعتلي حاجة كويسة".
"عمري ما جيت على مبادئي ولا كرامتي علشان أشتغل، مش باخد ملايين برضه على فكرة والحمد لله أنا بعرف أعيش كويس سواء معايا 5 جنيه أو 500 جنيه في المحفظة، عمري ما كنت بشتغل علشان الشهرة والفلوس، لو كنت بشتغل لسبب منهم كان زماني في حتة تانية".
"بحب التمثيل بجد هو فعلا الحاجة الوحيدة إللي بتبسط وأنا بعملها، متعب وبيخلي الواحد بعيد عن عيلته لفترة طويلة، ولكن بصحى كل يوم عايزة أروح الشغل علشان بحب الشغل"، "عمري ما أذيت حد، ولا بحب أذي حد، يمكن يكون في شوية خلافات أو حصل شوية خلافات ما بيني وبعض الزملاء، لكن مبحبش أقعد أعمل منها حوارات وخناقات على السوشيال ميديا".
"يمكن مشكلتي الكبرى إني صريحة بزيادة، ومش بعرف أنافق، وده ساعات بيسبب لي مشاكل من غير ما أخد بالي، لكن بجد لما مش بحب حد مش بعرف أبقى لذيذة، وبيبان عليا جدا ولما بيبقى حد من إللي المفروض أصدقائي وياخد رأي في حاجه هو عملها ومعجبتنيش بقول كده، ساعات بيتقبلوها وساعات لا".
"الحمد لله طلعت روحي، أقدر أقول عليه إنه أكبر نجاح ليا وإنه هيفضل دايما في قلبي ليه مكانة خاصة، مبسوطة الحمد لله من رد الفعل في كل حته، سوشيال ميديا أو في الشارع، وحابة بجد أشكر كل إللي اشتغلوا على العمل ده لأنهم بجد كلهم كانوا حابينه جدا جدا، وإن شاء الله العمل إللي جاي هيبقى حلو جدا إن شاء الله، الواحد بيحاول دايما يفضل متفائل علشان الحاجات الحلوة تحصل، وده أنا متاكدة منه إن شاء الله، وعارفة إن اليومين دول يمكن يكون الدنيا مش ماشية بسرعة، ولكن زي ما بيقولوا في التأني السلامة وفي العجلة الندامة".
