نشر الفنان المصري أحمد جمال مجموعة صور للمئات من جمهوره فى الحفلات وجوائزه التي حصل عليها، لكن علق عليها: "أنا معنديش جمهور"، وأنا مش ناجح"، ما أثار الصدمة لدى متابعيه .
ثم علق موضحا سبب نشره هذه الصور وأنه كان يقصد أن يوجه رسالة دعم وتشجيع لأي شاب يبدأ حياته العملية، وأن لا ييأس.
وكتب أحمد: "أنا عارف أنتم مستغربين من آخر بوستات نزلت وبتسألوني ليه كل ده، أنا هقولكوا ليه.....!! بس أنا دلوقتي بكلم الشباب الطموح اللي نفسه يحقق لنفسه مكان وكيان كبير، ولما حد يستفزك في نجاحك أو يحاول دايما يحبطك أو يوقفك طبيعي يبقى ده الرد ويكون الرد بتعبك ومجهودك وشغلك مش بالكلام حتى لو كان المشوار لسه في أوله.. الرسالة من البوستات اللى فاتت كانت واضحة.. يمكن كنت عصبي شوية بس ده طبيعي ما كلنا بشر".
وأضاف "وصدقونى الإنسان اللي عايز ينجح دايما غيور على شغله وحريص على أنه يبقى قد ثقة الناس اللى بتدعمه وواقفة جنبه من البداية وعمر الثقة بالنفس ما كانت غرور.. النجم محمد صلاح لما قال في 2014 أنا هفوز بجايزة أحسن لاعب في أفريقيا وعملها فى 2017 كان واثق فى نفسه ماكانش مغرور، والعندليب عبد الحليم حافظ أكتر واحد كان بيعانىي فى بداياته وقابل صعوبات وإحباطات مالهاش عدد كان واثق من نفسه وشايف وعارف هو هيوصل لفين".
وتابع أحمد جمال "اللي أنا عايز أقوله لكل الشباب والله العظيم وأنا بكلمكم زي إخواتي دلوقتي إن كل واحد فيكم هيفضل يسمع انتقادات طول ما هو عايش، وفي كل المجالات مش الفن بس، لكن اللي بيكمل هو اللي واثق من نفسه وبيسد ودانه وبيمشى ورا حلمه مش شايف غيره وساعتها نجاحه هو اللى بيتكلم بالنيابة عنه كلمة أخيرة قولتها وبقولها وهفضل أقولها لحد آخر نفس "أنتم صناع النجاح وأنا بكبر بيكم".
