أعلنت الفنانة مي كساب عبر أحد حساباتها الرسمية على مواقع التواصل الاجتماعي أنها سوف تطلق أغنيتها الجديدة "حبيبة قلبي" في عيد الام.
وكتبت قائلةً:"طول عمري بخاف جدا أغني أغنية وطنية أو أغنية للأم، بحس إن في عندنا في التاريخ الموسيقى أغاني مهما عملنا مش هتيجي أبدا في مستواها وطول عمري بحب أغني كلمات مش معتادة وألحان سهلة وبسيطة تتحفظ بسرعة من غير فزلكة".
وتابعت: "يمكن الحظ ما ساعدنيش أنى أخد حقي كمطربة، بس ده مش ذنبي للأسف، إحنا بنفتقد المنتج الموهوب الفنان المنتج اللي يهتم بموهبة حقيقية ويعرف يستغلها صح، معظم أو كل النجاحات اللي موجودة على الساحة اجتهاد فردي بحت فاقد لروح وجهد المجموعة وده مش صح، الفنان محتاج لمؤسسة تدعمه وتشتغل عليه وده اللي بتمناه وعندى أمل كبير جدا ان هيظهر المنتج الفنان وياخدنا على حصانه الأبيض".
وأضافت: "لحد ما ده يحصل باوعدكم السنة دي إن شاء الله بأغاني غير معتادة ومفاجآت كتير ليا على مستوى الغناء، هبتديها معاكم بأغنية عيد الأم اللي أول ما سمعت لحنها قولت لعزيز أيوه بقى يا بليغ، أغنيه"حبيبة قلبي" كلمات وألحان عزيز الشافعي، توزيع وسام عبد المنعم، هندسة صوتية مصطفى رؤوف".
