عبّرت الفنانة ندى أبو فرحات عن أسفها للحالة التي وصل اليها لبنان من خلال رسالة مؤثرة ونابعة من وجع كبير، عبر مواقع التواصل الاجتماعي.
ونال النص الذي نشرته ندى اعجاب عدد كبير من متابعيها وأصدقائها الذين بادروا إلى التفاعل ايجاباً مع ما كتبته .
وجاء في النص:
بمناسبة طفح الكيل
ماتو أعز أصحابنا بحوادث سير بسبب حالات الطرقات بلبنان و بوقتا، كان في رئيس جمهورية.
مشاريع فرز النفايات و إعادة تدويرا ممنوعة من التنفيذ، من وقت ما كان في رئيس للجمهورية.
مشاريع الطاقة الشمسية لإنتاج الكهرباء مطفايي، من إيام رئيس الجمهورية.
من بيتي ببيروت لشغلي ببيروت بتاخد نص نهار روحة رجعة من وقت ما كان في رئيس جمهورية.
خالتي انسرقت و اندبحت بدكانا و المجرم عم يسرح و يمرح عوقت ما كان في رئيس جمهورية.
اللبناني بعدو بيمشي عالإشارة الحمرا و بدوبل صف ثالث بالعجقة من وقت ما كان في رئيس جمهورية.
الخضار عم يختفي و التعصب كاسح البلد من وقت ما كان في رئيس جمهورية.
عم ندفع معاش النواب ليطمونا بالخرا من وقت ما كان في رئيس للجمهورية.
حاج تتحججو بالفراغ لتخفو فسادكن!
يا ريت منطالب بتعباية الفراغ الموجود بالأدمغة اللي وصلت لبنان لحالتو!
آخ يا بلدي شو إنك بحاجة لدم جديد! لعقل منطقي متطور مسالم و سليم!
آخ يا لبنان شو خرجك الانفتاح و السياحة و شعب بيعرف قيمتك!
شو خرجك شعب بطالب بحقوقو مش بحقوق زعيمو!
شعب بخاف عليك من وحشية العقول المغلقة!
آخ شو بحبك يا لبنان، لبناني إلي، لبناني اللي بحلم في!
