وجه الإعلامي وسام بريدي رسالة معبرة إلى جمهوره من خلال صورة نشرها عبر صفحته الشخصية على احد مواقع التواصل الإجتماعي.
وكتب بريدي: "أنا بحياتي ما قلت إنه الحلم هو طريق عابر، الحلم انت بتوصله يعني أحلامك بالحياة ما ممكن تتحقق إلا اذا انت سعيتلها، ولا نهار بحياتي إعتبرت إنه الحلم لازم يِجي صدفة، بِمجهود شخصي بتِقدر تحقق كل أحلامك"
"كِل الأحلام فيها تتحق، لإنه الإنسان بداخله كِل شي موجود، آدي هو عنده قدرة إنه يطلع هالشي الموجود ويضَوّي عليه بحياته، آدي أحلامه بتقدر تتح، أنا لا اؤمِن فقط إنه الحلم هو شي عَبَسي مامنقدر نوصله بطريقة عبسية من دون ما نعمل أي مجهود".
"ما بحياته طُموح الإنسان بيوقف، ولا بحياتك رح تقول أنا إكتفيت وأنا وصلت لمطرح وخلص، كِل ما إنت بتكبر مع الحياة، كل ما أهدافك بتختلف، الإنسان أقوى مخلوق خلقه ربنا على هيدي الأرض، إذا ما قدرنا نطبق الأمل والتفاؤل بحياتنا ما عنا خَيّار، يا منطبقهُن يا رح نعيش بيأس كل حياتنا، هيدي حياتنا ما بحياتها رح تكون وما بحياتها رح تتغير إلا إذا نحنا قررنا إنه نغيرها"
"أنا ضُد فكرة إنه الإنسان يبني حياته على الحظ، إنت بتخلق حظك بالحياة، مجهودك بالحياة هو اللي بيِعطي، الأهم من كل شي نعرف كيف نتواصل مع اللي غادَرونا من هيدي الدني، نعرف كيف نخليهُن عايشين معنا، صلاتي منّها كلام برّدِدُه، صلاتي هي عيش بعيشه مع كِل يوم مع ناس بحياتي، بِدمعوا عيوني وبغرغروا، بحِس هيدي هي طريقة التواصل، هيدي هي اللحظة اللي عصام بِقِلي فيها أنا بحِس فيك، وقت ما يحِطلي هالدموع بعيوني"
"هيدي كِل إنسان لازم يعتبرها إنه هيدي لِغة التواصل، هيدي طريقة التواصل بينك وبين الشخص اللي غادَرك على هيديك الدني ما رح تقدر تحكي إنت وياه بالحك، ما في شي بيقدر يخليك تكفي وتستمر بهالحياة إلا إيمانك، إيمانك وصلاتك اللي هي أساس لقاءك مع الآخر"
"الحياة بتضَوّيلك على قصص كثير مهمة، ضَوّتلي على حالي، إنه ما بحياتك بتقدر ترسم الشي اللي إنت بدك ترسمه ويبقى مستمر، يعني الأهم من هيدا كِله هي مش وقت ما بتوقع بمصيبة، المهم إنه إنت كيف تعالج هيدي المصيبة، وقتها بتحول الألم لفرح إيمانك، ما ممكن شي يقدر يعوضك عن هيدا الفرح".
