تحدثت الفنانة نينا عبد الملك عن مشوارها الفني الذي لا زال ببدايته نظرا لحلمها الكبير .
وروت نينا قصتها قائلة:
"من لما كان عمري 9 سنين وأنا حلمي كون فنانة مشهورة، فتت بكورال المدرسة وصرت غني بحفلات آخر السنة وهيدي كانت أول خطوة اني اثبت اني موهوبة بالغناء.
من سنة لسنة صار يزيد إصراري وحلمي يكبر معي، لما صار عمري 18 سنة حضرت دعاية ستار أكاديمي الموسم الثامن وقررت اني اشترك. فكرت انو هيدا البرنامج حيسهل العملية ودغري صير رقم واحد بالفن، وطبعاً كان تفكير كتير غبي. اشتركت وانظلمت وضهرت ورجعت لحياتي الطبيعية بس الفرق انو العالم صارت تعرفني. انك ترجع لنقطة الصفر من بعد ما كنت تحت الأضواء لأشهُر شي كتير مدمّر للنفسية، أول فترة كنت ما نام بالليل ، بس بعدين رجعت قدرت استوعبت انو لا ما لازم خللي هالشي يأثر عحلمي، لازم كمّل. قدرت بثلاث سنين وبصعوبة اني أعمل 3 أغاني تضلني موجودة عالساحة وما انتسى، ستايلن متلو متل اللي عم يتغنى ما شي مميز بس عالقليلة عملت شي، بس من جوا بدي اكتر بدي شي غير ! شي يعمل نقلة نوعية بالفن مش يعملني زيادة عدد. بس هالشي تيتحقق لازم تكون مع شركة مع مدير أعمال شاطر مع فريق عمل يدعمك، مستحيل يصير انا ولحالي، تعبت انا ولحالي اربع سنين وما عم بستفيد حتى من الأغاني اللي عم نزلن.
وتابعت: "هيدي السنة اجا انسان شايف فيي هيدا الشي الغير اللي حكيت عنو، وثقت في ومضيت معو ومع شركة يونيفيرسال العالمية، وعملنا البوم كمشروع جديد عالعالم العربي بيتضمن رسايل كتير حلوة اذا بتعطو فرصة وبتسمعو، مش متل ما معودين عليي بفهم وانا ما حكمل بهالستايل هيدا كان مجرد ( مشروع ) والآتي بأكدلكن مليون بالمية انو أعظم ، بس انا تعبت كتير توصلت لهون وتبلشت شم ريحة النجاح بالفن وإني عم اثبت حالي ويللي بتوقعو منكن كداعمين مش التجريح انما التفهم وتقدير كل خطوة قد ما كانت بسيطة لأن بالنهاية تنوصل للهدف ونلاقي حالنا وشو بدنا بالظبط بدنا نجرب كتير اشياء، وتننجح بدنا نفشل. انا كتير فخورة بنفسي لأني رفضت اختار الطريق السهل تأوصل، اخترت الجهد، والزعل، والدموع، وتعب النفسية، بس كسبت الإحترام وراحة الضمير والطريق النظيف".
