رثا الممثل المصري خالد ابو النجا شقيقته سلوى عبر مدونة نشرها على احد مواقع الانترنت، حيث شرح بالتفاصيل ما حدث، والذكريات التي كانت تجمعهما.
وكتب ابو النجا قائلاً " سلوي…اختي…اجمل بنت في مصر…البقية في حياتكم…كنت في مطار في اليونان لما كلمني طارق اخويا و قال لي الحق يا خالد.. سلوي يا خالد..
سلوي أختنا..
خطفها حريق النهارده.. لما رجعت بنفسها داخل الحريق .. بيقولوا في محاولة عشان تنقذ قططها.
كأنه امبارح لما كنت “دودي” اخوها الصغنن اللي ماسك ايديها و سلوي واخداه معاها النادي يتفرج علي تدريباتها او ماتشاتها في الباسكت و الهاندبول في نادي هليوبوليس او تاخده معاها مع الفريق في سفريات حول العالم
كنت اخوها الصغنن “دودي” اللي ماحدش يعرفه و كنت باسمع كل التعليقات اللي بتحسدها علي جمالها و حبها و التزامها الرياضي
دايماً فخور بيها زي كل اخواتي الكبار
كلهم… فخور بيهم…كلهم رياضيين..كلهم جمال..كلهم يشرفوا مصر كلها..و غالبا كانوا السبب ان انا كمان حبيت اكون زيهم..
سلوي ابوالنجا.. بطلة الهاندبول و الباسكيت…
أجمل واحدة شفتها في حياتي…اتخطفت…
مش بس الموت اللي بيخطف..
الإكتئاب بيخطف
بيخطف عشان الناس بتخذلنا فبنوصل لدرجة ان مافيش بكرة نصحي له
الحزن بيخطف
الحزن بيخطف عشان بنحب ناس بيتغيروا و بيبقوا ناس تانيين!
الحزن بيخطف عشان بيحبنا ناس زي ما كنا في يوم بس احنا بنتغير و بنكبر و ماحناش زي ما احنا اللي حبوهم!
الندم بيخطف
الندم علي قرارات في حياتنا لو ماتصالحناش معاها بيخطفنا.
الثورة بتخطف.. و بتتخطف.. و اللي بيخطفوها بيحاولوا يخطفونا بإسم الدين مرة و بإسم العسكر مرة..حياتنا بتتخطف مننا… بالتدريج..كده في لحظة… كل الوقت… كل العمر.. كله بيخلص!
فجأة…
حريق في بلكون الشقة يوم 20 يوليو 2015
الساعه 4 العصر تقريبا ..
نجلا و سلوى لما اكتشفوا الحريق و حاولوا السيطرة عليه فتحوا باب البلكونة ليمتد الحريق للشقة كلها للأسف..
و بعد ما تنقذ سلوي و نجلا
لكن ترجع سلوي للحريق
باين عشان تنقذ قططها
فتختنق سلوي من دخان الحريق مع القطط.
بس،مش بس الإختناق اللي خطف سلوي ولا بس القطط ولا بس الإكتئاب، ولا بس الندم، ولا بس الحزن، ولا بس الثورة، ولا بس الدين و العسكر.
اللي خطف سلوي مننا كلنا، غالباً
الخوف!
الخوف علي القطط اللي بقت اهلها
الخوف من بكرة بلا أمل
الخوف من الناس اللي بلا قلب
الخوف و التخويف من مجرمين الدين و العسكر
سلوي أختي سامعها بتقول .. يا دودي.. ماتزعلوش… أنا باحبك يا دودي …باحبكم كلكم
القطط و نجلا و سيوفه و طروقة و هشومة و سمسمه و كوووولكم..
و بطل موضوع الخطف ده يا ولد
انا مع مامي ،و ها نبعت لكم من الجنه حضن و بوسة كل يوم بدل الصور اللي كنت بابعتها لكم كل يوم و ادوشكم بيها :)
بس عندك حق يا دقدق…
مش قادره اقول هتوحشوني..
عشان كنتم واحشيني أصلاً..
خلوا بالكوا من بعض.. مالكوش غير بعض..
مامي قالتها.. و اديني انا كمان اهو باقولها..
باحبكوا..
احنا بنبدأ نتخطف.. لما بنبدأ نخاف..الخوف أذي.. و الحب حياة، البقاء لله.. البقاء للحب
البقاء لله.. البقاء للحب".
