نشر الشاعر الغنائي المصري أيمن بهجت قمر رسالة توجه فيها الى الفنان عمرو دياب من دون ان يذكر اسمه.
وقال قمر:" اكيد لما بتفارق حد كان فيه بينك وبينه عشرة ساعات بيوحشك، ساعات بتحن لكل أيامك معاه وممكن كمان تندم على بعدك عنه، وممكن تحس انك اتسرعت انك سيبته او خسرته، وساعات برضه لما بتفكر بعقلك بتغضب وتلوم نفسك على ندمك ده، خصوصا لو موقفك ده نتيجته انك انت واللي حواليك والناس اللي منك هيحترموك وقبلهم انت هتحترم نفسك، يمكن ماتحسش بنتيجة ده النهارده وتحسه بكره، لكن أكيد مادام قدرت تدوس على نفسك وتاخد القرار، يبقى لازم تستحمل كل المشاعر المختلفه والمتضاربه دي".
وأضاف أيمن: "أهم حاجه تخليك تحس إن اللي قدامك يستاهل تضحي عشانه أو يستاهل انك تيجي على نفسك انك تحس انه يستاهل، ويستاهل دي جواها معاني كتير، يعني هو انك تبقى متأكد ان هو كمان مستعد يضحي وييجي على نفسه عشان خاطرك، مايبقاش أناني ياخد اللي هو عايزه وبس، ولما تحتاجله يسندك، مش تلاقي نفسك مسنود ع الهوا".
وتابع:" اللي بينا كانت سنين وعشره، علاقه الطرفين استفادوا منها، واللي يشوف غير كده يبقى مجنون، لإن الشواهد كلها بتقول كده وعايشه ومش هتموت، واللي مش معترفين بده هما أول ناس بيصرخوا مع كل كلمه بتتنطق في الصفحات الخاصه بيا في تاريخ حكايتي معاه، كان ممكن يحل كل ده بكلمة، بمكالمة، بموقف، بلفتة اهتمام صغيرة، يمكن مالهاش وزن قصاد كفة اللي اتقدم واتعمل واتعاش وعاش ولمس قلوب كل اللي شهدوا ع الحكاية وحفظوا كل كلمة ف تفاصيلها، المواقف واضحة والبياع مابيفكرش هو بيبيع مين صاحبه، ناسه، مكانه، نفسه حتى".
واكمل ايمن بهجت قمر في رسالته قائلا:" بيع المهم انك تقبض تمن البيع ده وتحس بنشوة في السباق، وتحس بالانتصار في نهاية الصراع، وتحس بالشبع مع انك مش جعان، مع ان لانت محتاج تسابق لإنك سابق اساسا، ولا محتاج تصارع حد، انت محتاج تعيش وتستمتع وتحمد".
وفي نهاية الرسالة بدا جليا انه يتكلم عن الفنان عمرو دياب حيث استخدم عناوين الاغنيات الخاصة بدياب حيث قال:"صديقي اللي راح، ما انكرش بفتكرك، مانكرش اني اوقات بغير عشان انا مش ملاك، ما انكرش اني بغضب وبثور وبندفع، لكن "صدقني خلاص" "م الليلادي" مش ندمان، صديقي اللي "كان طيب"، "هلومك ليه"، و"نقول ايه" وللا "يهمك ف ايه" حتى ، عموماً هي "أيام وبنعيشها" و"كل واحد يعمل اللي يريحه" ، إمضاء اللي كان "اكتر واحد بيحبك".
