بعد إنتشار فيديو يجمع النجم العالمي " ليونيل ميسي " مع الفنان المصري احمد حلمي في اعلان جديد لاحدى شركات رقائق البطاطا، أوضح حلمي حقيقة مقابلته للاعب الأرجنتيني "ليونيل ميسي".
وكتب حلمي على احد مواقع التواصل الإجتماعي:" يا اصدقائي وصديقاتي الاعزآء، انا ماقلتش اني قابلت ميسي ولا حتى شفته .. انا قلت "ده اعلاني الجديد مع ليونيل ميسي" .. انما كل واحد مننا صور الجزء بتاعه في بلده .. وده الطبيعي اللي بيحصل في الاعلانات اللي بيكون فيها كذا شخصيه من جنسيات و دول مختلفه"
وإعترف حلمي بانها غلطته انه لم يوضح طريقة عمل الاعلان واستكمل قائلاً:"بس ده لاني تخيلت ان دي حاجه ممكن تكونوا عارفينها .. وعلي فكره في اعلانات كتير اجنبيه اتصورت بالطريقه دي برضه .. بس طبعا كله لازم يكون بالاتفاق والموافقه مع كل الاطراف اللي هتظهر في الاعلان .. يعني كل واحد لازم بيبقي عارف مين الشخصيه اللي هاتظهر معاه في الاعلان ولازم يكون موافق عليها كمان .. والا كان بقي زمان كل واحد راح عمل اعلان لنفسه حط فيه كل نجوم العالم ..".
وأضاف :"على فكره انا لما عملت الصفحه دي عملتها علشان اكون متواصل معاكوا .. مش علشان اخدعكوا .. لان اخر حاجه ممكن اعملها في حياتي هي اني اخدعكوا او اضحك عليكوا .. لاني قبل ما اخدعكوا هاكون بخدع نفسي .. اوعدكوا المرة الجايه في اعلاني مع "جيمس بوند" هابقى دقيق اكتر من كده .. (مافيش اعلان مع جيمس بوند ولاحاجه .. انا بهزر لحسن تاخدوها بجد) .. وكل سنه وانتوا طيبين" ..
