اعتذرت الممثلة المصرية فريدة سيف النصر عن المشاركة في مسلسلي "علي كلاي" للممثل أحمد العوضي، و"ست الحسن" للممثلة هند صبري، وذلك بسبب حزنها على وفاة شقيقها الكابتن بدر سيف الدين.
وفي التفاصيل كتبت فريدة عبر صفحتها على موقع التواصل الإجتماعي: "على فكرة ناس على الخاص بتقولي مش عايزين نحرجك.. بس لو جالك شغل هاتنشغلي.. حبايبي أنا صادقة مع نفسي ومع اللي حواليا.. ماليش نفس لحاجة.. مثلا أنا بتعلم أكون قد كلمتي ولكن كله نصيب.بحب العوضي جدا وكان ممكن ابقى معاه فى (كلاى) بس نصيبي بقي ربنا يوفقه ياااااارب، وكمان حسين المنباوى مع النجمة التونسية الكبيرة هند صبرى فى (ست الحسن) بس نصيبى كده.. والحمدلله كنت دائما بأعانى من أنى مش عارفة أخرج من أى شخصية عملتها بسهولة.. المرة دى مش عارفة أدخل بروحي لأي شخصية قريتها، روحى مش موافقه تنسى حاليا نفسها.. وأنا أتعودت ما أكذبش على حد ولا نفسي، ومن عشقي لشغلي ولكم مش هاكون صادقة.. برغم أني فى أشد الحاجه للخروج من جوه نفسى.. لكن نصيب ومبروك على اللى يختاروه".
وتابعت:"الحمدلله على كل اللى يجيبه أنا راضية لكن غصب عني راح مني غالي أوي لا يعوض، اتخبطت من شوية فقولت أخ فبكيت لوحدي.حبيت اشكر المحترم المنتج الفنى أستاذ هانى عبدالله اللى عملت معاه (عملة نادرة) والحقيقة هو العملة النادرة دى شكرا لاهتمامه وأدبه وأخلاقه العالية وسامحنى مش قادرة حتى اعتذر واتناقش مافينيش نفس وماعنديش نفس.. نصيبى كده، ياااارب بالتوفيق للكل، وقدر الله وما شاء فعل، وللعلم رمضان الماضي برضه عملين منهم بتاع النجمة روجينا.. يارب ياكريم اكرم الكل.. شكرا".