روت الممثلة اللبنانية ليليان نمري تفاصيل حول كيف اختار والديها اسمها حين ولدت، وكتبت في منشور على صفحتها: "متل اليوم ٣ الا ربع وج الصبح لمن البدر يبلش يشَّق النور خلقت محسوبتكم ، كانو بعدن عم يتخانقوا عالاسم اذا اجا بنت .
. بيي بدو يسميني عا اسم عمتي * مهجة العيون * رجع غير رأيه يسميني عا اسم ستي نظيرة ، بس خالي منصور كان راجع من السينما وبعدو حاضر فيلم رومانسي وبطلة الفيلم اسمها ليليان وقلُن ليليان وبس وشرَّفت بعد ما عبدو ركض حافي والدني عم تشتي عا سن الفيل ليجيب الدايي وانسَّمت قال : ما لاقت عليا تخَّلف الا وج الصبح ؟ وعبدو شقعلها عالتقيل .. وتاني يوم المطرب الكبير حسن غندور اللي كان صديق مُقرب من العيلة ، عالسريع سجل اغنية ( ابتسم الفجر على شفَتيكِ يا نينا ) وانذاعت بالاذاعة اللبنانية ما بعرف ليش كانوا كلن ناطرين ومفحوطين هالقد .. الحمدلله الولادة كانت سهلة ما عذبتها ابداً".
وختمت: "حكاية وحكيناها وبعبكُن خبيناها تحية حب وعبوطة لكل بنت رح تخلق اليوم ويا رب تكون كل ايامها فرح وصحة وتحقق احلامها ويخليلكم ولادكم وولاد ولادكم".
