تمرّ الممثلة وملكة جمال مصر السابقة إنجي عبد الله بمرحلة صحية صعبة، فقد أعلنت عبر حسابها الرسمي، أنها تواجه للمرة الثانية ورمًا في جذع المخ، ما اضطرّها للعودة إلى رحلة علاجية قاسية توقّعتها قد انتهت.
وقالت في منشور مؤثّر: "عدى 6 شهور وأنا بحاول أتعالج للمرة الثانية من ورم في جذع المخ، هو مش سرطان لكنه موجود في أخطر مكان في المخ... للأسف كل الدكاترة في مصر وبره مصر، أساتذة في مجال الأورام والمخ والأعصاب، رفضوا يعالجوني لأني أخدت كل جلسات الإشعاع والكيماوي المسموح ليّا سنة 2019، وكنت فاكرة خلاص أنا تمام، لكن للأسف رجعت ليّ أعراض أسوأ بكتير من زمان".
وأضافت واصفة ما تعانيه: "أنا فقدت الإحساس بالجنب اليمين، وصعوبة في البلع، وكهربا في جسمي كله لما بعمل أي حركة بسيطة حتى لما بحرك عيني، وفي حاجات تانية كتير... حتى المستشفى اللي اتعالجت فيه قبل كده طلبت مني أمضي إقرار إني مسئولة عن كل اللي ممكن يحصل لي لو اتعالجت، فمشيت من الخوف".
وتابعت: "أنا مش بحاول أتعالج علشان متمسكة بالحياة، أنا بس تعبانة جدًا بقالي كتير، وبدعي ربنا بحاجة واحدة بس: اللهم لا نسألك رد القضاء ولكن نسألك اللطف فيه".
إنجي تحدّثت أيضًا عن شقيقتها التي تواجه مرضًا عضالًا، قائلة: "الشخص الوحيد اللي بيقف جنبي هي أختي، اللي عندها ورم في الرئة والمخ في المرحلة الرابعة... كنت فاكرة إن أنا اللي هخلي بالي منها، لكن حالتي بتتأخر كل شوية."
واختتمت رسالتها بدعاء صادق مليء بالوجع والرضا: "أنا راضية بقضاء ربنا الصعب أوي ليّا ولاختي، لكن الحياة بجد صعبة جدًا ومفاجآتها أصعب… ادعولي".
