عبر رئيس هيئة الترفيه السعودية المستشار تركي آل الشيخ، عن رأيه بما رآه في البلدان التي زارها، ضمن جولته لمدة شهر خارج المملكة، بين أوروبا والمملكة المتحدة وأميركا.
وفي تفاصيل ما كتب المستشار: "لمدة تتجاوز الشهر كنت خارج المملكة بين أوروبا والمملكة المتحدة وأمريكا بقول كلام فيه البعض بيتهزاء فيه أو ما راح يصدقه لكن بقول اللي شافت عيني ... أبي اتكلم في قطاع السياحة والترفيه أولا ما لقيت ولا سينما نظيفة ...وكراسي غير مريحة وشاشات عرض قديمة وانظمة صوتية مضروبه فرق السماء والأرض عن السينما في الخليج عموما والمملكة خصوصا ... ثانيا المطاعم الخدمة طاح مستواها كثير وعدد العاملين أقل من المطلوب ونفسية اللي يخدمك مضروبه وكان يصرف عليك وجودة الأكل صح جيدة لكن لا تختلف كثيرا عنا وفي بعض الأحيان عندنا أفضل... الأوتيلات قديمة في أغلبها والجديد منها ملخبطين في الخدمة ولا تعودو وغرف من دقة في الأغلب وريحة وخدمة غرف وطلبات دون المستوى فرق السماء والأرض عن عندنا الله لا يغير علينا ... والآن عن الملاهي والتجربة الترفيهية كلها قديمة ولا في جديد ومن دقه وزحمة وخدمة أقل من عادية لدرجة أن اولادي في كل مكان يقارنو بينها وبين موسم الرياض والخليج والكفه عندهم تميل لنا طبعا... والآن بتكلم عن الأمان لا تلبس ساعة للرجل والمرأة لا تشيلين شنطة للمرأة خليك مصحصح في القهاوي والمطاعم انتبه وانت راكب التاكسي وش الله حادني أكون على أعصابي كسائح ... خليجنا ومملكتنا أمن وأمان الحمد لله ... باختصار جالس متحمس للمشاريع اللي بتجي وبتكون نقله ومتأكد أنها بتعدي الغرب بمراحل ... وإذا بتتكلمون على الجو من آخر شهر تسعة إلى نص شهر خمسة الجو عندنا جميل ورائع وخصوصا من شهر 11 إلى شهر 3 جونا أحلى جو في العالم وباقي السنة فيه مدن عندنا في الجنوب والطائف والشمال جوها رائع ... باختصار الخليج عامة ومملكتنا الحبيبة خاصة في الحاضر والمستقبل هي الوجهة في العالم وإذا اكتملت المشاريع ووسائل النقل والقطارات بينا وانتهت المطارات ووصلت طلبات الطيارات سنكون بعبع كبير في السياحة والترفيه ... حفظ الله مولاي خادم الحرمين الشريفين وسمو سيدي ولي العهد القائد الملهم عراب الرؤية المباركة الذي يعمل ليل نهار لوضع مملكتنا الحبيبة في مصاف أكبر الدول في العالم في كل القطاعات ...والوعد بيني وبينكم في قادم الأيام وبتشوفون إن الله أحيانا الكلام اللي قلته بعيونكم ...و خليجنا واحد".
