تحدثت الفنانة المصرية بشرى عن تفاصيل قصة حبها لزوجها خالد حميدة، وكيف تعارفا، مؤكدة أن القصة تعود لسنوات عديدة.
وقالت بشرى في أول لقاء إعلامي بعد إعلانها زواجها: "إحنا كنا زملاء في مدرسة واحدة، نعرف بعض من أيام المدرسة وأخوه كان مع أختي في الفصل وصديقها جدا زي أخوها، كل الناس اللي كانوا معانا في المدرسة كانوا عارفين هذه المعلومة وكان كتير منهم معزومين في الفرح، هو شخص أنا أعرفه من زمان جدا. الفنان الكبير محمود حميدة هو اللي مربيه لأن والده توفى لما هو اتولد، وحتى وإحنا في المدرسة اللي كان بيجي اجتماع أولياء الأمور على طول أستاذ محمود حميدة مع والدته السيدة مها. هو شخص ساب مصر لفترة طويلة، ولما ظهر من سنة ابتدينا نرجع نتكلم من واشتغلنا سوا والشغل جاب احتكاك وتعارف أكتر، وأنا مش باخد وقت كبير في قرار الجواز لأني معنديش رفاهية أفضل أعرف حد ويتحسب عليا، أنا عارفة المجتمع اللي أنا عايشه فيه وأنا أم وعندي أولاد وست مشهورة ولازم أراعي الجزء دا، لما أعرف حد ويكون في ارتباط بفضل نمشي بشكل رسمي عشان أريح بالي من الصداع واحتراما لأمومتي وجمهوري. خالد شخصية مستقلة جدا عايش برا مصر، بيفكر بطريقة خارج الصندوق المعتاد هنا وشبه فكري، شبه فكري لأن أنا على قد ما أنا شرقية وبحترم المجتمع اللي أنا فيه لكن عندي أفكار غربية كتير عشان نشأتي زيه هو مواليد بريطانا زي حالاتي، هو عملي وأنا ست عملية، هو شخص بيكره المدينة وبيحب يبعد عنها ويروح أماكن فيها طبيعة وإحنا شبه بعض في كدا، مجتهد وبتاع شغل وأنا كده".
