نشرت الممثلة المصري رشا العدل، ابنة الممثل والمخرج الراحل سامي العدل، بيان توضيحي تكشف فيه عن الأزمة الصحية التي تعرض لها مؤخراً.
وكتبت العدل عبر صفحتها الخاصة على موقع التواصل الإجتماعي، "بوست توضيحي علشان مش ملاحقة أرد علي كل الناس غصب عني سامحوني، يوم الخميس صحيت بألم فظيع في صدرى ذراعي واحساس بالشلل فعليا و شبه قاطعة نفس و فجأة جالي هبوط و وقعت ضغط ٧٠/٤٠ و تم نقلي الى مستشفي في وضع شديد الخطورة منها باسعاف مجهز الى مستشفي تخصص قلب حالتي شبه ميؤوس منها، جلطة مكتملة في جدار القلب وسدد كامل في الشريان التاجي الأيمن وتم إبلاغ امي و بنتي اني هاموت في خلال الساعة حرفيا مش بهزر وسمعت بودني و ابتديت اتشهد و اقرأ كل القرآن اللي حفظاه خايفة ولكن راضية بمشيئة ربنا و بمعجزة من ربنا سبحانه و تعالي كتب لي عمر جديد والشريان التاجي فجأة فتح نسبة ١% اللي هي لا تُذكر اصلا كانت سبب اني اعيش وكل الدكاترة بالإجماع استغربوا من حالتي في سني ده".
وتابعت العدل :"مؤخراً انا اتحطيت تحت ضغوطات كتير صعبة و مؤلمة من وفاة اخويا الصغير لغربتي في دبي لخسارة شغلي لمشاكل عائلية وشخصية لإكتئاب حاد وكتمت جوايا فوق احتمالي ومن هنا احب اقول لكم ان الإنسان ضعيف قوي وهش مفيش حاجة تستاهل و ربنا لا يوريكم اللي انا شوفته ابدا لا فيكم و لا في حد بتحبوه".
وأضافت العدل :"في الأيام المفترجة دي اتمنى الناس اللي بتحبني تدعي لي لأني في قمة اكتئابي وبمر بفترة موجعة جدا في حياتي من كل النواحي".
ووجهت العدل شكر إلى كل الأشخاص الذي ساندوها في محنتها وقالت :"شكرا لكل الناس اللي وقفت جمبي واتخضوا عليا على رأسهم أمي وولادي، عمي محمد روح قلبي اللي حضر في التو واللحظة و شوفت خوفه وخضته عليا في عينيه عمي جمال رغم وجوده خارج مصر كان متابع ثانية ب ثانية عمي مدحت ووجع قلبه عليا عمتي اغلي انسانة في الدنيا علي قلبي وحتة مني عمي رمزى الجميل، والد ابنتي الأصيل ايهاب طبوزادة اللي جيه علي ملا وشه من السفر مخصوص اخويا خالد والدته ماحدة نور الدين و خطيبته هنا ... ولاد و بنات و مراتات عمامي كلهم طبعاً ماقدرش اتجاهل ابدا نقيبي دكتور اشرف ذكي اخويا و صديقي اللي قلب الدنيا علشان ينقذني في أسرع وقت ممكن و منير مكرم اللي كان أول واحد يحضر علشان ينقلني للمستشفي المناسبة لحالتي الجدعة صحبتي و صاحبة امي ماجدة حافظ اللي فضلت معايا لحد ما وصلتني البيت و بنتي الغالية علي قلبي ام حمزة جنة ابراهيم ، زمايلي و اصدقائي الجميلة نهال عنبر الغالي ايمن عزب اخويا ايهاب فهمي امي التانية راوية سعيد و طبعا نص مصر اللي كلموا ماما علشان خافوا يكلموني ، صحابي من خارج الوسط بقي دول مش هاقدر اكتب اسامي لأنهم بجد كتير قوي ربنا يخليكم ليا".