صرح المخرج المصري تامر نادي متحدثاً عن سبب عدم مشاركة الممثلة المصرية ريهام عبد الغفور في مسلسل "صلة رحم" رغم أنها كانت المرشحة الأولى، وقال تامر نادي : "لما أستاذ صادق الصباح كلمني عن المسلسل كان من البداية معانا إياد نصار، وبعدها كان معانا ريهام عبد الغفور، وبدأنا نشتغل على المسلسل لأن هو في البداية كان الفكرة عن استئجار الرحم لكن مكنش في أحداث درامية قوية فبدأنا نشتغل عليه".
وتابع: "ريهام عبد الغفور اعتذرت لأن جالها مشروع كبير هي بتشارك فيه واستأذنتني وأنا قلت لها تروح طبعا للحاجة اللي بالنسبة ليها هتقدم لها خطوة أقوى، وبدأنا نغير في المشروع تاني إلى أن وصلنا للشكل اللي طلع بيه وانضم لينا المؤلف محمد هشام عبية لأن أنا حتى لو مؤلف كنت عايز أركز أكتر في الإخراج وأسيب المنطقة دي لحد اعتمد عليه، كان معانا إنجي المقدم في دور زوجة إياد نصار، وأسماء أبو اليزيد كانت المرشحة التانية بعد اعتذار ريهام عبد الغفور".
وأضاف: "إلى أن وصلنا للأبطال المشاركين في المسلسل وكانت يسرا اللوزي مكان إنجي المقدم، كل النجوم أجادوا التمثيل، لكن بالنسبة ليا يسرا اللوزي فاقت توقعاتي لأني بشوفها أنها ممثلة كويسة جدا من زمان من وقت مسرح الجامعة لكن كانت دايما في الأدوار اللي بتاخدها مش بتطلع كل الإمكانيات واتكلمت معاها في كده أن محتاجين نطلع كل الأداء وكل اللي جواها واشتغلنا على الشخصية والمراحل اللي بتمر بيها".
وكانت تلك التصريحات خلال مداخلة هاتفية مع الإعلامية إنجي علي في برنامجها "أسرار النجوم" عبر إذاعة وقناة "نجوم FM" .
