تحدثت الممثلة المصرية ناهد السباعي عن تأديتها دور جدتها الفنانة المصرية الراحلة هدى سلطان، مؤكدة أنه غير ممكن، ورشحت أن تقوم الفنانة المصرية دنيا سمير غانم بهذا الأمر.
وقالت ناهد السباعي: "أنا سمراء وجدتي بيضاء وشعرها أصفر، مش هينفع أنا كان نفسي لو كنت شبهها لكن ولا حتى الروح، حرام أبوظ تاريخ العيلة، أنا ممكن أساعد في التأليف. مرة سألوني مين ممكن تعمل دور جدتك قلت أن أكتر واحدة دلوقتي تبقى مغنية وممثلة وتكون محبوبة هي دنيا سمير غانم، هي بتحب تقلد ومن أكتر الناس اللي نفسي أشوفهم بيعملوا دور جدتي، لكن جدي لأ لحد دلوقتي مفيش حد شبهه. ماما لما حاولت تعمل قصة فريد شوقي وهدى سلطان نجوم كتير قالوا لأ ونخاف نعمل كده، قصة حبهم كانت حلوة وماما كانت عايزة تقدم القصة دي. جدي وجدتي احترموا شغلهم وكانوا بيقدموا فن وثقافة وبيغيروا سلوك مجتمع وبيغيروا قوانين وبيطلعوا قوانين جديدة وأنا بحس إن دي حاجات في ميزان حسناتهم، جدي في فيلم "كلمة شرف" غير قانون أن السجين يقدر يخرج ياخد عزاء حد من أهله، اعتقد أي حد مسجون بيقدر يخرج ياخد عزاء والده أو والدته دا ثواب لجدي".
حديث ناهد السباعي هذا جاء خلال لقائها في برنامج "نجوم رمضان أقربلك" من تقديم إنجي علي عبر إذاعة وقناة "نجوم FM".
