رد مخرج مسلسل الحشاشين بيتر ميمي على انتقادات تعرض لها المسلسل من بعض المشاهدين والنقاد، وذلك بسبب عدم نقله للأحداث بشكل دقيق خلال القرن الحادي عشر الميلادي، واختيار قصة "حسن الصباح" المعروف بأفعاله الشريرة، من خلال منشور عبر صفحته الخاصة بموقع للتواصل الاجتماعي.
وأكد ميمي أنه يحترم آراء الجمهور، مشيراً إلى أن المسلسل لا يتناول قصة الحشاشين بشكل تقليدي، بل يركز على جوانب أخرى من القصة.
بدايةً، قال ميمي إنه لم يفضل الرد على انتقادات الجمهور بعد عرض أربع حلقات فقط من المسلسل، الذي اعتبره من وحي التاريخ، مؤكدا أن العمل لا ينقل وثائق تاريخية وإنما دراما تاريخية، وهو ما تم ذكره في "التتر" بحسب تعبيره.
وجاء في كلام بيتر ميمي :"طيب كل سنة و انتم طيبين .. مع انى مكنتش حابب اتكلم علشان دول كلهم ٤ حلقات!
مبدأيا المسلسل من وحي التاريخ و ده مكتوب نصا فى التترات يعنى مش وثيقة تاريخية لكنه دراما تاريخية .. هو المخرج العالمي تارنتينو لما قتل هتلر فى السينما كان حقيقة؟ او نابليون فى فيلم ريدلي سكوت الاخير هل ده نابليون اللي في كتب التاريخ؟ ديه دراما تاريخية .. حاولنا نعمل خيال لفترة من الفترات لكن فى شكل درامي.. لكن رجعنا فى الديكور و الملابس لمراجع كتيرة و نادرة علشان نعمل عالم مشوفنهوش قبل كده و ميكنش شبه افلام او مسلسلات عالمية…
هل ده حسن الصباح؟ مفيش كتاب اتفق على حسن الصباح لان المغول حرقوا القلعة و كتبه و افكاره و الموجود اجتهاد… ماركو بولو او فلادمير بارتول او برنارد لويس او فرهاد دفترى… و كتير جدا
حسن الصباح كان بيعمل معجزات؟ لا طبعا!!! و ده تباعاً مع الحلقات هيتفهم
الحشاشين مسلسل تاريخي بالعامية المصرية.. الاحداث بين اتراك و فرس .. لما عملوه الاتراك اتكلموا تركي و لما عملوه الامريكان بيتكلموا انجليزى .. احنا عاملينه فى مصر و الترجمة موجودة فى كل بلد.. المسلسل بيتعرض فى روسيا و امريكا و اكتر من بلد كل بلد بلغتها..هم الڤيكنجز كانوا بيتكلموا انجليزى؟ ولا ويليام والاس كان بيتكلم اللكنة الامريكية
ليه حسن الصباح؟ حسن الصباح شخصية فذة و غريبة و مستفذة انك تعرف عنها .. مش لازم يكون رمز للخير علشان يتعمله مسلسل.. هتلر و راسبوتين كانوا فى منتهى الشر لكنهم شخصيات فذة غيرت العالم .. او على مستوانا المصرى خط الصعيد او سفاح اسكندرية
حاجات صغيرة،
- ام الخليفة رصد كانت نوبية الاصل
- اسكندرية مدينة فى مصر .. لان فى مدن كتير باسم اسكندرية حوالين العالم .. لزم التوضيح للترجمة لان فيه غير مصريين بيتفرجوا على المسلسل
- مجاعة القاهرة الفاطمية مثبوتة تاريخيا لكن تعددت اشكالها حسب المصادر و هى على فكرة كانت قبل وصول حسن بفترة مش بعيدة بس ديه دراما (من وحي التاريخ)
- ماتسمى بمعجزات حسن الصباح مقصود تتصور بالشكل ده و ده هيبان تباعا و خصوصا مشهد الراوي حلقة ٨
- عم ملك شاه اتقتل بوتر القوس لان ده كان عرف و تقليد
مين الست اللى بتظهر لحسن الصباح؟ ده فى حلقة ٣٠ بقى لو ربنا ادانا عمر..
كل سنة و انتم طيبين و سعيد ان المسلسل خلاكم تقروا و تسألوا .. و شوية شوية هتفهموا المسلسل .. صحصحوا معانا كده يا شباب خلونا نعمل شكل جديد .. و تبقى بداية و مع الوقت يتعمل افضل و اكبر و احسن من اللى احنا عاملينه .. و مع الوقت ننافس …سنغزو العالم".
