تحدثت الممثلة المصرية يسرا عن طفولتها والصعوبات التي مرت بها، مستذكرة ما فعلته والدتها من أجلها، وما شعرت به عند انتقالها للعيش مع والدها.
وقالت يسرا: "اتربيت في وسط أمي وخالاتي وخيلاني وقعدت معاهم لحد سن الـ14، والحقيقة عملوا مجهود كبير جدا عشان يدوني حياة حلوة، حياة أعرف أكمل فيها، أنا فاكرة أن أمي كانت بتنزل تبيع أي حاجة عندها عشان تدخلني أغلى مدرسة عشان أتعلم تعليم كويس".
وأضافت: "لحد سن معين كانت طفولة سعيدة، بعد الـ14مكنتش طفولة سعيدة، لأن والدي أخدني من ماما، وبالتالي عشت مع والدي وأنا معرفوش، حد غريب بالنسبة ليا، ومفيش بيني وبينه تفاهم، كان صعب جدا أن من حياة فيها كل حاجة ليكي لفجأة حياة مفيش ولا حاجة ليكي".
وأكملت يسرا متحدثة عن والدها: "منعني من المدرسة ولما مروحتش درست في البيت، لما نجحت سألني إزاي نجحتي؟ كان دايما عندي تحدي إني أنجح، فاكرة أني قعدت لمدة سنة ونص مش بشوف حد ومش بكلم حد حتى ماما ودا كان شيء صعب جدا عليا هي كانت حياتي ولو أمي مش مربياني بقوة كان زماني معرفتش أكمل الحياة نفسها اتعلمت منها كل حاجة".
وتحدثت يسرا عن زوج والدتها وقالت: "جوز أمي اكتشفت حبي ليه بعد ما مشيت من عند ماما لأني عملت مقارنة بين الأب الحقيقي وبين زوج الأم اللي كان أب حقيقي وأكتر، بعد ما بقيت عندي 25 سنة صدفة قابلته في العجمي جريت عليه وطلبت منه السماح لأني عاملته وحش جدا وأنا طفلة ومكنتش عارفة قيمته، كنت السبب في طلاقة من أمي وطلبت منها السماح هي كمان".
تصريحات يسرا جاءت خلال لقائها في برنامج "بصمة" عبر Discovery الشرق.
