تحدثت الممثلة المصرية سوسن بدر عن فكرة الخضوع لعمليات التجميل، مشيرة أنها لا تحب تغيير شكلها وتحب كثيرا الخطوط الموجودة في وجهها مؤكدة إلى أنها لن تحصل على دور فتاة جامعية أو في المرحلة الثانوية لذا لا تحتاج أن تبدو أصغر عمرا.
وقالت سوسن بدر : "أنا دلوقتي بقيت كده وزي ما الناس قبلتني زمان وحبوني، هيحبوني دلوقتي وأنا كده ويحبوني بعدين وأنا أكتر من كده، والخطوط اللي عندي في وشي أنا بحبها جدا، أحط حقنه في وشي ليه؟ أنا مش ضد ده كل واحد حر يعمل اللي يبسطه أنا اللي باسطني أني محافظة على حواديت عمري في وشي".
وتابعت سوسن بدر: "أنا مش هيتعرض عليا دور بنت في الجامعة ولا ثانوي هيجلي دور مناسب لسني وشكلي زي ما أنا كده واللي عايز يعمل يعمل، كل واحد يعمل اللي يبسطه".
وكشفت سوسن بدر عن أبرز ملامح طريقتها للمحافظة على قوام رشيق، سواء باتباع نظام غذائي مناسب، أو ممارسة أنواع معينة من الرياضة.
وقالت: "أنا مش حارمة نفسي من حاجة، لإني لو حرمت نفسي ممكن أنفجر في الأكل مرة وحدة، أنا أكلي مرتين في اليوم، فطار كويس جدا، وآخر وجبة مع الغروب كإني في رمضان، وآكل كل حاجة لكن الحلويات على طرف الشوكة لو نفسي في حتة بسبوسة".
وأضافت: "مقدرش آكل فاكهة كتير لأنه سكرها يسبب الجوع أكثر، لكن ممكن أضيفها على السلطة".
وكانت تلك التصريحات خلال لقائها مع الإعلامي معتز الدمرداش في برنامج "ضيفي" .
