من خلال مقطع فيديو نشره الفنان والملحن المصري عصام كاريكا، كشف عن كواليس تلحينه أغنية "ياللي نسيت الغرام" للفنان المصري محمد سعد في فيلم "بوحة"، وسبب خلافه معه.
وذكر كاريكا أن الأغنية كانت في الأساس لفنانة من منطقة المنصورة في مصر، وطلبت منه أغنية، فأسمعها أغنية "يللي نسيت الغرام"، ودفعت له عربوناً، لكن كاريكا تلقى بعدها اتصالاً من خطيبها، الذي قال له إن خطيبته لن تستمر في الغناء، وطلب استرداد العربون.
واستدرك: "في الوقت ده كنت بعمل مسرحية "شبورة" ومحمد سعد بيعمل مشهد بصوت أطاطا وسمع الأغنية في الستوديو وقالي حلوة، وفي الوقت ده عملت لمحمد سعد كمان أغاني فيلم "55 إسعاف" وفيلم "اللمبي" وفيلم "اللي بالي بالك"، ولما جينا نعمل فيلم "بوحة" شرحلي المشهد، وطلب مني الأغنية اللي سمعها لما كان عندي في الستوديو وقت مسرحية "شبورة"، وطلب كمان يتكتب موال في البداية، فكتب الشاعر الراحل سمير زكي موال "ياللي نسيت الغرام... ارجع هنا وقولي"، وبعدها كلّمتني مي عز الدين وقالتلي إن اسمها "كوتة" في الفيلم وطلبت نضيف اسمها في الأغنية، ولكن واحنا في الاستوديو اختلفنا، وده اللي ضايقني وزعّلني، الأغنية فيها قافية وكان عايز يشيل جملة "تحت السلم بنام" وقالي محمد سعد مش عجباني وعايز كلمة "سجادة بين إيديك"، ولو اتغيرت يبقى لازم هنغير القافية، فكلمت المنتج وائل عبد الله، وقالي معلش عشان خاطري مشّيهالي... وائل بعتبره أخ وصديق، وكنت قاعد في الستوديو قلبي بيتقطع، رغم إني كنت ناجح وقتها وعملت شكل كتير مع نجوم كبار الوقت ده، ولكن جيت على نفسي، ومشيتها "سجادة بين إيديك"، ونجحت الأغنية نجاح غير طبيعي لما غنّاها من فترة كورال "روح الشرق"".
كما قال كاريكا: "قلبي اتقتل مرة تانية لما لقيت جماعة بتوع المهرجانات اللي مش بيسيبوا أي حد في حاله وياخدوا اللحن ويحطوا أي كلام ومش مهم مين لحنها، وأخدوا لحن الأغنية ومحدش كلمني، بعد اللي حصل ده أقول إيه؟ لا إله إلا الله".