دافعت المخرجة المصرية بتول عرفة بقوة عن السعودية، وفي التفاصيل كتبت عرفة:"بجد كفاية نغمة "سحب البساط" اللى بتتقال على السوشيال ميديا مع كل نجاح بيحققه فنان مصري في حفلة بالسعودية، أو مع كل مسلسل ناجح على شاهد وmbc لنجوم مصريين، أو حتى مع فيلم مصري بيحقق إيرادات عالية في دور العرض السعودية؟؟
الحقيقة الموضوع فيه مبالغة كبيرة ومستفزة، ومش مفهوم مصدرها، لأن الطبيعي إن الفن المصري يكون موجود في كل حتة بقوة وتميز، ده جزء من وظيفته، وده دور مصر التاريخي مع أشقاءنا العرب، اللي بيحبونا وبيعتزوا بينا وكانت الأفلام والأغاني والمسلسلات المصرية هي البوابة الحقيقة لحبهم للشعب المصري، واللي بيزيد مع الوقت وعمره ما بيتأثر بالكلام اللي بيتكتب ده.
.
وطول عمر السعودية بيشاركوا وبينتجوا أعمال مصرية، طب ما مسلسلات "الشهد والدموع" وثلاثية نجيب محفوظ كانت إنتاج دبي وعجمان في الثمانينات، و"النوة" و"الراية البيضا" و"البخيل وأنا".. وغيرهم كانت إنتاج الرياض.. ليه وقتها محدش أتكلم وقال "سحب البساط"؟؟؟
النغمة دي جديدة علينا.. وأكيد مش بتعبر عن قاعدة حقيقية في الجمهور المصري أو السعودي، اللي بيهمه بس إنه يستمتع بالعمل وبنجومه ويحتفي بيهم.. بصرف النظر عن أي كلام تاني ملوش أي معنى
مصر و السعودية هيفضلوا بلد واحدة و قريبين لبعض جداً
و نجاحهم نجاحنا و نجاحنا نجاحهم".
