تحدثت الممثلة المصرية عنبر عن الظلم الذي تعرضت له في الفن، وتجاهل المنتجين لها، وعدم عرض أي عمل فني عليها في الفترة الأخيرة، مؤكدة أنها مرت بظروف صعبة للغاية.
وقالت عنبر: "في ظلم كبير بيقع على جيلنا، جيلنا اتظلم وفي أسماء ونجوم كبار ركنوهم وقعدوهم في البيت، تاريخها كله راح على الأرض، تعب السنين راح، المنظومة كلها اتقلبت وبقت مختلفة، على حساب مين أنا معرفش. مسألة اختيار النجوم مش بعدد الفلورز على التيك توك، المسألة بالتاريخ، في فنانين عاملين حاجات غريبة على التيك توك، دي مش تركيبتي ولا هعرف أعمل زيهم، المقياس حالياً بقى من خلال الفلورز مش بالتاريخ، والدليل مشاركات البلوغرز في الأعمال الفنية، الأجيال الجديدة من المخرجين صغيرين بيتقال إنهم ميعرفوش الفنانين القدام، الحقيقة دي جملة سخيفة، جبتوا الناس البلوغرز منين وتاريخهم فين، والشللية منتشرة جداً، والعلاقات الاجتماعية. الفنان له مصاريف خاصة، ومتطلبات معينة، وبمر بظروف مش حلوة، زوجي ممثل زيي ونفس شغلتي، بمر بظروف صعبة زي باقي الناس بسبب الغلاء، أنا بني آدمة وعندي بيت وعندي حياة ولو معايا فلوس أنا وجوزي فخد من التل يختل، وأنا قعدت خمس سنين بدون شغل، ومش هعرف أشتغل حاجة تاني غير الفن، الحياة ماشية لكن مش زي ما أنا عايزة، بعيش يوم فيه ويوم ما فيش ودا لا يقلل مني عايشة زي الناس العادية... أنا بحترم النجوم اللي أمّنوا حياتهم بمشاريع تانية بعيدة عن الفن، لكن أنا معرفتش أعمل كده، وإحنا مهنتنا مفيهاش صاحب".
