أوضح الفنان المصري خالد سليم حقيقة الاخبار التي تنتشر بين الحين والاخر عن علاقته بزوجته والتي تتناول موضوع وجود خلافات عديدة بينهما.
وخلال حلوله ضيفاً على برنامج "حبر سري" مع الاعلامية أسما إبراهيم قال: "إشاعات خلافاتي مع مراتي ممكن تأثر عليا نفسيا في حاجات بسيطة كده، عشان خيرية بتضايق شوية من الكلام بس هي عارفة إن أي حد تحت الإضاءة معرض بشكل كبير للقيل والقال وتدخل الناس زيادة عن اللزوم في حياتنا واحنا ارتضينا إن دي طبيعة شغلنا".
وتابع : "أكيد في أي بيت فيه خلافات بس مفيش أي حاجة توصل للانفصال ولا أي حاجة من الكلام ده خالص، الفكرة بس إن الفنان حياته بتتزحم قوي وبنقعد بالـ 14 ساعة في مكان شغلنا وبنروح عشان ننام ساعتين ونصحى تاني يوم عشان نكرر نفس الموضوع فحياتنا بتتسحب مننا وأصحابنا القريبين بيبتدوا يرموا طوبتنا".
وأضاف: "فدايما لما كان في مناسبة خيرية كانت بتروح تجامل الناس وحبايبنا كلهم وجاملونا كتير ووقفوا معانا في مواقف كتير فلازم نجاملهم، فبالتالي خيرية كانت بتروح المناسبات دي لوحدها فالناس ابتدت تسألها هو خالد فين؟ وكانو بيضايقوها ومبيصدقوش إني مشغول ودول ليهم تأثير كبير عليها نفسيا فبدأنا أي وقت أكون موجود معاها أخدها نتعشى مع بعض ونتصور وننزل الصور".
