تحدثت الفنانة المصرية ميرهان حسين عن سبب إتخاذها القرار بالإعتزال وتراجعها عنه بشكل مفاجئ.
وقالت ميرهان حسين: "أنا زي أي حد ممكن أتضايق وأحس بظلم وأتعب، واتخنقت جدا وحسيت إني عايزة أبعد عن كل حاجة مش قصدي الفن تحديدا، وكتبت على إنستغرام إني أجازة مفتوحة من السوشال ميديا وكنت عايزة أريح نفسي؛ لأن كل حاجة بقت تضايقني. أنا لما قلت كلمة أعتزل كان قصدي أعتزل ما يؤذيني لأن حالتي النفسية غير مستقرة، إنما لو قلت الجملة كانوا هيفهموا إن الفن بيئذيني، وأنا كتبت وقفلت تليفوني كام يوم وبطلت أتفرج على التليفزيون، لإني مكنتش مستنية حاجة تحصل إنما كنت في إجازة، ووصلي حب الناس وإن كتير زعلوا عشاني، وبشكر كل حد من صحابي والجمهور وأي شخص كتبلي كلمة كويسة، ودا خلاني أشوف الصورة أفضل وإن الحياة مش سودا كلها".
وفي لقاء لها مع الإعلامية ياسمين عز في برنامج "كلام الناس": "الفن المفروض يخضع في المقام الأول للموهبة والكاريزما مش العلاقات، وللأسف الوسط الفني العلاقات فيه بتلعب دور كبير، ولكن فيه كتير أبناء فنانين ولم يعيشوا النجاح لإن معندهمش موهبة كفاية ولا حب الناس، ولازم الفرصة تكون أساسها الموهبة، إنما لو واحدة متجوزة منتج ولا مخرج وعندها موهبة يبقى مفيش مشكلة، لكن لو تفتقر للموهبة يبقى مينفعش. بطلب من المخرجين والمنتجين يشوفوني في أدوار مختلفة؛ لإني اضطريت أقعد في البيت كتير في بداياتي الفنية لإن الأدوار بتتكرر وبالتالي برفضها، وأنا مش بنتج بنفسي ومقدرش أختار الدور، والمخرج لازم يشوف قدرات الفنانة اللي قدامه ومينفعش يجيب واحدة مش مصرية ويخليها تحاول تتكلم مصري، والظلم وحش وعدم التقدير أوحش. ممكن الإنسان يقول رأيه بس بدون ما يجرح؛ لإن أحيانا الناس على السوشال ميديا ممكن يكونوا أطفال ماسكين موبايل أو ناس مدعيين الأخلاق".
