استذكرت رشا سامي العدل، والدها الراحل الممثل سامي العدل، في الذكرى السابعة لوفاته، وذلك عبر حسابها الخاص على موقع التواصل الاجتماعي.
وجاءت ذكرى رحيل سامي العدل، متوافقة مع ثاني أيام عيد الأضحى، فقالت رشا بهذه المناسبة الأليمة: "العيد مش عيد من غيرك مالوش اي طعم بجد زاد عليه السنة دي ان ذكرى وفاتك بكرة كمان وانا في دهب من غير اهل ولا أصحاب يهونوا عليا ".
وأضافت رشا هذه الكلمات المؤثرة، في افتقاد والدها في حياتها وخطواتها اليومية، وقالت:"مشيت و سيبتني بدرى قوي كان لسة فيه كتير عايزة اعيشه معاك كان نفسي تبقي جمبي واخد رأيك وصيحتك في قراراتي مؤخرا، مش عارفة ان صح او غلط مش عارفة اتعامل وتايهة كدة من بعدك لا عارفة أقف على رجلي وأواجه كل الصعوبات ولا عارفة ادي الدنيا ظهرى واكبر دماغي بقيت بخاف اخاطر بأي قرار اذا كان في حياتي الشخصية،الأسرية او العملية. عارف ليه؟ علشان لما كنت عايش كان عندي الجرأة اخاطر و عارفة انك موجود توجهني لو غلطت و تقف جمبي و تدعمني لو انا صح .. وحشتني قوي يا سمسم و وحشني لمتنا علي سريرك نتكلم و نرغي و نبعت نجيب أكل ونتفرج على فيلم او نتناقش في كتاب انت قريته او مسلسل بتحضر له وحشني حاجات كتير قوي معاك مالهاش اول من آخر لدرجة اني متغاظة منك ازاي تمشي كدة وتسيبني من غير اب وسند في الدنيا الصعبة دي.. هو مش انا دلوعتك واول فرحتك يا حج سامي واللا ايه طلعت قاسي قوي رغم انك كنت أطيب قلب الله يرحمك و يحسن اليك".
